Засгийн газрын ээлжит хуралдааны шийдвэрийг танилцуулж, Монгол Улсын Сайд, Засгийн Газрын Хэрэг Эрхлэх Газрын дарга Д.Амарбаясгалан мэдээлэл хийлээ.

Энэ үеэр тэрбээр, Энэ бүтэн сайн өдөр гэхэд Улаанбаатар-Дархан чиглэлийн авто замын хоёр урсгалыг нээнэ. Засгийн газраас гадаад валютын нөөцийг нэмэгдүүлэх чиглэлд 362-р тогтоолыг баталсан. Иймд ЭрдэнэсТавантолгой ХК-д 560 сая, “Эрдэнэт үйлдвэр” ТӨҮГ-т 300 сая ам.долларын нөөц бүрдүүлэх үүрэг чиглэл өгөгдсөн байдаг. Бусад уул уурхайн компаниудад ч борлуулалтын төлбөрөө татан төвлөрүүлэх үүрэг өгсөн байдаг.

Үүнтэй холбогдуулан, төлбөрийн тэнцлийн алдагдал өндөр байгаа энэ үед ЭТТ ХК-д зургаан сарын хугацаатай онцгой дэглэм тогтоож байна. Энэ хүрээнд тус компанийн үйл ажиллагааг сайжруулж, төлбөр тооцоог нэмэгдүүлэх үүрэг бүхий Засгийн газрын бүрэн эрхт төлөөлөгчөөр /БЭТ/ Сангийн дэд сайд Ж.Ганбатыг томилж байна.

Онцгой дэглэм тогтоосон хугацаанд, бүрэн эрхт төлөөлөгч Ж.Ганбат нь дараах эрх, үүргийг хүлээнэ:

• Бүтэц зохион байгуулалтыг шинэчлэх, шаардлагатай бол томилж, чөлөөлөх
• Хөдөлмөрийн болон технологийн журам тогтоож, зөрчигчдөд хариуцлага хүлээлгэх
• Ордоос ачих, тээвэрлэх, худалдан борлуулах бүх үе шатанд хяналт сайжруулах
• Хөрөнгө оруулалтад хамтарсан хяналт шалгалт хийж ЗГ-т танилцуулах
• Гадаад валютын улсын нөөцийг нэмэгдүүлэх 362-р тогтоолыг хэрэгжүүлж ажиллах
• Онцгой дэглэмийн үр дүн, явц байдлыг сар бүр танилцуулах" гэв.