Товчхондоо хэлэхэд, Хөгжлийн банкны зээл сонгуулийн сурталчилгаа, банк бус санхүүгийн зээлд зарцуулагдсан уу эсвэл үндэсний үйлдвэрлэл бүтээмжид шингэсэн үү гэдгийг тогтоох л үлдсэн. Хөгжлийн банкны дуулиан оффшор шиг мартагдахаас өмнө. Улстөрчид хулгайлаад ББСБ-аар мөнгө угаачихсан уу, эсвэл Үндэсний үйлдвэрлэл бүтээмжинд шингэсэн үү гэдгийг үнэн бодитойгоор тогтоож чадах уу гэдгийг Л.Оюун-Эрдэнэ Ерөнхий сайд болон Хуульзүйн сайд Х.Нямбаатар нараас итгэл тавин хүлээж буй иргэд олон. Монголын нийгэмд авилгын том том гэмт хэрэг хэвлэлээр баримт нь шуурч, дуулиан болоод мартагддаг. Төрийн өндөр албан тушаалтан, Улс төрчид монголын ард түмний мэдэлд Үндсэн хуулиар олгогдсон боломжийг хулгайлж, дээрэмдэж, зальдаж, гадныхантай хамжиж гар дамжуулаад оффшорт хав дардаг бусармаг байдал мартагдах шахжээ.

Олон Улсад шившигтэй баримтууд нь ил болсон Улс төрчид Монголд бол энд тэнд уулзалдаж, ил далд нүүдэл хийцгээж, засаг төрийн холио солио зохицуулсан шиг хээв нэг байна. Нэг хэсэг монголд төрийн өндөр албан тушаал хашиж байсан зарим нэр бүхий улс төрчид бүгд шахуу л хууль шүүхийн хаалга татацгаасан ч одоо бүгд нарны өөдөөс нуруу гэдгэр алхацгаах. Оффшорын араас шил дарах том хулгай бол Хөгжлийн банкны хэрэг. Улс төрчид ард түмнээ дотооддоо шулсан хамгийн том гэмт хэрэг бол Хөгжлийн банкны асуудал. Гэхдээ хэн нэгнийг ч юм уу хэсэг бүлгийг нэрлэж яллаад шийдэгдэх хэрэг огт биш.

Монголын Улсын хөгжих замд улс төрчид нь хулгайлж хумсалж саад хийж болдог гажуудлын жишиг. Нэг мөр шалгаж, холбоотой фактуудыг албан ёсоор хууль шүүхийн хүрээнд шийдвэрлэх нь ч зөв. Хэрвээ ингэж чадахгүй л бол шударга ёсны гэрэл гэгээ бүр мөсөн бөхөх нь. Хамгийн түрүүнд системээ цэгцлэх хэрэгтэй. Холбогдох эрх зүйн орчин буюу “Хөгжлийн банк”-ны тухай хуулиас эхлээсэй.

Хувийн хэвшил зээл авахад улс батлан дааж, улмаар улс төрчид өөрсдийнхөө компаниар давуу эрхтэй зээл авдаг байдлыг арилгах, төр авсан зээлийг нь буцааж төлдөг бурангуй хачин үзэгдэл буюу эрх мэдэлтэй нэг нь улс, түмний мөнгөөр түрийвчээ зузаалж цөөхүүлээ баяждаг байдалд цэг тавих цаг нэгэнт болжээ. Монголд энэ мэт санхүүгийн ил булхай луйварт дүн шинжилгээ хийчих аудит байдаггүй юм бол гадныхан хөлсөлж аваад ч болов эхнээс нь цэгцтэй, дорвитой үнэн зөв шийдвэрлэх, эс бөгөөс хэн нэгнийг үнэн худал нь мэдэгдэхгүйгээр яллахаас урьтан ширээний ард сууцгааж, ил тод хэлэлцэхгүй бол эрх баригчид бусдын захиалгаар үндэснийхээ үйлдвэрлэгчдийг нухчин дарах, аж үйлдвэрлэл, үндэсний хөрөнгөтнүүдээ хүчээр нухчин дарах ажлыг санаатай хийж түүхэнд хар толбо үлдээх нь үү дээ... гэж дүгнэхэд хүргэнэ.

Ямар ч улс үндэстний хөрөнгөтнүүд, үйлдвэрлэгчид нь эдийн засгийн болоод гадаад дотоод аюулгүй байдлынх нь баталгаа, дархлаа, цөм нь болдог 21-р зууны шинэ чиг баримжааг бид алдаж болохгүй. Гадны хөрөнгө оруулалтын таатай орчин аль хэдийн зүүд зэрэглээ болж үндэсний үйлдвэрлэгч нар айдастай өдөр хоногууд ардаа үдэж байгаа нь нууц биш болжээ. Хулгайг бүтээмжээс ялгах л үлдлээ.

Хөгжлийн банкнаас хууль бусаар гарсан зээл сонгуулийн сурталчилгаанд, банк бус санхүүгийн зээлд, оффшорт гэх мэтээр зориулалтын бусаар зарцуулагдсан уу аль эсвэл үнэхээр бизнесийн орчин, үндэсний үйлдвэрлэл, эдийн засгийн бүтээмжид шингэсэн үү гэдгийг тогтоохгүйгээр улс төрийн явцуу аргаар хэн нэгнийг яллах, аль нэг бүлгийг хүчин мөхөстүүлэх зэвсэг болж хувирах л ноцтой үр дагавартай.

Улс төрчдийн идсэн уусан сонгуульдсан хөгжлийн банкны хэргийг ханшийн өсөлтөд алуулсан үндэсний үйлдвэрлэгчид үүрчих вий дээ... Үндэсний үйлдвэрлэгчидээ боомилбол эдийн засгаа боомилсонтой адил билээ. Хөгжил хүчирхэг үндэсний үйлдвэрлэл, цэвэр үндэсний хөрөнгөтнүүд, зөв эрх зүйн орчинд л бий болно