Монгол тусгаар тогтносон бүрэн эрхт, парламентын засаглалтай, ардчилсан Улс. Гэтэл экспортын чухал бүтээгдэхүүний нэг ба стратегийн гол түүхий эд нүүрсний үнэ огт өсдөггүй. Үүнийг эрх баригчид тайлбарлахдаа олон улсын зах зээлийн эрэлтээс шалтгаалж байна гэх ч үнэндээ манай экспорт ганцхан улсаас хамааралтай. БНХАУ нүүрс авахгүй гэвэл эдийн засаг элэгээрээ хэвтчихдэг. Томоохон улс төрчдийн бизнес ч нүүрсний зах зээлийн хаяа бараадаж байгаа нь нууц биш. Манай улс нүүрсний нөөцөөрөө дэлхийд эхний 15-д ордог. Гэвч бид нүүрсээ боловсруулж чадахгүй байна.

Монголчууд нүүрсийг өнгөрсөн зууны эхэн үеэс олборлож эхэлсэн ч өнөөдрийг хүртэл гол төлөв цахилгаан, дулаан үйлдвэрлэх зорилгоор түлж, шатааж хэрэглэж ирсэн.

Харин дэлхий нийтэд нүүрсийг боловсруулж шингэн түлш, метанол, диметилын эфир зэрэг төрөл бүрийн бүтээгдэхүүн гарган авах технологи хөгжсөөр ирсэн бөгөөд бид энэ чиг хандлага руу ойртох ёстой хэмээн эрдэмтэн судлаач ид үзэж байгаа юм. Мөн нүүрсээ боловсруулж дэлхийн дах нийлүүлснээр одоогийнхоос хэд дахин илүү ашиг олох боломжтой гэдгийг салбарынхан онцолж байгаа. Нүүрсний салбарын хөгжлийг хурдасгах нь эдийн засаг, экологийн талаасаа асар үр дүнтэйг эрдэмтэн судлаачид, салбарынхан онцлоод уджээ. Гэвч боловсруулах үйлдвэр барих ажлыг нэн яаралтай эхлүүлэхийн оронд энэ салбар улс төрийн зэвсэг болж хувирсан нь харамсалтай.