Монгол Улсын Ерөнхий сайд Л. Оюун-Эрдэнэ тэргүүтэй засаг эрхшээгчид сүүлийн үед ах нараа дийлэхгүй болохоор цухалдсандаа гудамжинд үзэл бодлоо илэрхийлж байгаа залуучууд, иргэдийг барьж хориод хорсол тайлж, уураа дардаг болов уу. Уг нь үг хэл үзэл бодлоо чөлөөтэй илэрхийлэх эрх Үндсэн хуулиар бүх ард түмэнд олгогдсон. Манай Улс нийгмийн алдаж болохгүй асар том үнэт зүйл юм сан. Залуу засаглагч нарт зангараг дутагдаж байна уу даа. Ардчилсан нам эрх мэдэлтэй, олонх үедээ ямар ч шүүмжлэлд цөлх ухаан гаргаж, уужуу тайван ханддаг байсныг эрх биш Улс төрийн туршлагатай МАН-ынхан мэддэг. Шүүмжлэлд дургүй хэт эмзэг байдал нь эцэстээ хэмжиж, тогтоож болохгүй аюултай гэнэтийн үр дагавартай ч байж мэдэх юм.

Учир нь аливаа дарангуйлал эцэстээ хэзээ ч энх тайван сайн сайхан байдалд хүргэх боломжгүй байдаг. Нэг талдаа нийт ард түмний эрх ашгийг намаасаа давж хэлэлцэж, цэгцэлж, шийдвэрлэж чадахгүй байгаа нам төвтэй засаглалын хуучин хэлбэр лүү аандаа гулсаад орчихлоо. Ийм үед ажил цалин хоолноосоо салахгүй цаашлаад лавхан атгаад барьцаа лавшруулах санаархалтай долдой, доргио, хөнгөмсөг хөөрүү зөвлөхүүдийн үгэнд бус дугаар хорооны өнөө маргаашаа боддог санаа нь зовж зүтгэж хөдөлмөрлөж шар нар бор хоногийг түгжрэл түгдрээнд барж байгаа ядуу борогшуу ард түмнийхээ үгийг сонсох цаг болжээ эрх баригч залуу сайд нараа.

Гүтгэлэг шүүмжлэл хоёрыг ялгаж салгадаг хэн нэгнийг хилсээр хууль бусаар харгисаар ялладаг бурангуй тогтолцоог сэргээж боломгүй.

Улс төр, амар амгалан хоёр зэрэг хэзээ ч оршдоггүйг мэддэг учраас хатуу үгэнд эмзэглэж, дундуур хаясан яс бүрийг сэдэв болгож ярьж байгаагүй ардчилсан намын ч, МАН-ын ч ах нарынхаа үг хэл үзэл бодлоос сургамж авч шүүж тунгаах цаг болжээ. Том Улс төрд жижиг гэлтгүй чих халууцуулсан, чээж доргиосон том шүүмж их. Жижиг шүүмжүүдийг өнгөрөөж чадахгүй хэврэг эмзэг Улс төрчид олон болж болохгүй ээ. Гэртээ ээж аавдаа, намдаа ах нартаа эрхэлдэг шигээ шүүмжлэл хэлсэн болгоныг барьж хориод байвал энэ Улсад шоронгийн төсвөө дийлэхгүй хорих лагерь болох юм уу?