УИХ дахь АН-ын бүлэг 2023 оны улсын төсвийг алдагдалтай баталж байгааг эсэргүүцэн, мэдээлэл хийлээ. Энэ үеэр УИХ дахь АН-ын бүлгийн дарга О.Цогтгэрэл: "Төсвийг алдагдалтай баталснаар бизнесийнхэнд мөнгө очихгүй, иргэдэд мөнгө очихгүй нь. Төр улам данхайх нь. Төсвийн алдагдал гэдэг чинь өр зээлээр л санхүүждэг. Тэгэхээр улсын өр улам нэмэгдэх нь. Иймээс 2023 оны улсын төсвийг дэмжих боломжгүй. Мэдээж МАН УИХ-д хэт олонхи байгаа учраас хуулиа батлаад явах нь гарцаагүй. Эрх баригчид бүх зүйл сайн сайхан болж байна гэсэн мэдээллийг өгсөөр ирсэн. Гэвч иргэдийн хөргөгч хоосорч байна, ажилгүйдэл ихэссэн, хоёр хүн тутмын нэг нь ядуу болчихлоо.

2023 онд Монгол улс дампуурах бодит эрсдэл бий боллоо. Эрх баригчдаа, та нарын эдийн засгийн бодлого цааш явах боломжгүй болчихлоо. МАН-ын ам, ажил зөрүүтэй байна." хэмээсэн бол

Харин УИХ-ын дэд дарга С.Одонтуяа: " Улсын төсвийг алдагдалтай батлах юм бол ямар аюул бидний өмнө байна вэ? гэвэл нэгдүгээрт, бид гадаад өрөө төлөх боломжгүй болно. Хоёрдугаарт, төгрөгийн ханш суларч, юмны үнэ өснө. Хамгийн аюултай нь эдгээрээс үүдээд бизнесүүд хумигдаж эхэлнэ.

Ингэснээр татварын орлого багасна. Төсвийн ерөнхийлөн захирагчдын урсгал зардал 480 тэрбумаар, томилолт, үйлчилгээний зардал 132 тэрбумаар нэмэгдэж байгаа. Нөгөө хэмнэлт хаана байна вэ? 2.7 их наядын хөрөнгө оруулалт гэдэг бол түүхэнд байгаагүй их зардал. Эдийн засаг муудахад Монголчуудын бүгдийнх нь амьдралд нөлөөлнө. МАН-ын эдийн засаг, АН-ын эдийн засаг гэж байхгүй " гэв.