Сүүлийн эрх баригчид иргэдээ төрөл бүрээр ялгаварлан гадуурхаж, илт дээрэнгүй доромжилсон утга агуулгатай зүйлс төрийн ордон дотроос ярих боллоо. Нэг биш нэлээд хэдэн сайд дарга нар зориуд гэмээр ийм үйлдлүүд гаргаж байгаа нь нэг намын хэт олонх үед дотоодын зөрчилдөө идэгдэж өөр хоорондоо уралцах хандлага нь ийнхүү зарим улс төрчдөөр туг тахиж байна уу? гэмээр. Учир нь Л. Оюун-Эрдэнэ Ерөнхий сайд авилгалтай хүчтэй тэмцэхээ илэрхийлэх болгонд ард түмний дургүйцлийг албаар өдөөсөн хандлага илэрхийлэгддэг гэж таамаглахаас аргагүй. МАН-д одоогоор засгийн эрх булаацалдах, бялуу хуваалцах хэмжээний өрсөлдөгч, хүчтэй сөрөг хүчин бус өвөр зуураа хоолоо булаацалдах зовлон л тэдний нэр хүнд бага ч атугай цэвэрших, өсөн дэвжихэд саад учруулж, 2024 оны сонгуульд ялалт байгуулах магадлалыг ямхаар шимэгдүүлжээ.

Мөдхөн эрх баригч нам бага хурал хуралдуулж нарийн бичгийн даргаа тодруулах ба үүнд Ерөнхийлөгч, Ерөнхий сайд нарын зүгээс өөрсдийн хүнээ тавих сонирхол асар хүчтэй бий болж улмаар Засгийн газрын үйл ажиллагааг Ерөнхийлөгчөөс санал оруулж томилуулсан сайд нар зориуд хорлон сүйтгэх ажиллагаа явуулж, үе үе барьц алдуулах хандлага халуун улс төрийн тогооноос ханхлаж байгааг ч нуух аргагаүй юм.

Тухайлбал 11 сарын 22-нд л гэхэд УИХ-ын гишүүн, хариуцсан сайд нь хүртэл иргэдийн бухимдал, стессийн шалтгаан болоод байгаа түгжрэлийн асуудлаар байр суурь илэрхийлэхдээ илтэд гадуурхаж, ялгаварласан, дээрэлхэж доромжилсон утга агуулгатай зүйл ярьсан юм. Тухайлбал Түгжрэл хариуцсан сайд гэх Ж. Сүхбаатар сайд ... гэр хорооллын иргэд эмийн сан орох гэж хотын хорооллуудаар орж ирснээс үүдэн түгжрэл үүсгэдэг гэсэн бол УИХ-ын гишүүн Б. Энхамгалан: ... хөдөөнөөс хотод орж ирээд түгжрэл үүсгээд, халтуур хийгээд байдаг иргэдийг татварын бодлогоор болиулах хэрэгтэй... гэх утгатай зүйл ярьжээ. Эрхэм төрийн түшээд нэг өдөр, нэг сэдвэр нэг агуулгатай ялгаварлан гадуурхах хандлага илэрхийлсэн нь цаагуураа улс төрийн ямар зорилго агуулж байгааг таашгүй.

Үүнээс гадна түрүүчийн долоо хоногуудад иргэдийг улны гэж доромжилсон, нас хүйсээр нь хөгшин залуу гэж гадуурхаж ярьсан сайд, дарга нар огцорч хариуцлага хүлээсэн. Нэг талдаа хариуцлагагүй, ёс суртахуунгүй, Үндсэн хууль зөрчсөн мэдэгдэл яриа тайлбар хийснийхээ төлөө хариуцлага үүрэх нь сайн жишиг боловч эргээд ард түмэн доромжлуулсан хохиролоо яаж барагдуулах вэ? Гэдэг том асуулт урган гарах юм. Сайдын суудлаасаа огцорсон ч тэд төрд нөлөөтэй, гишүүн, дарга хэвээрээ л байх болно.

Төрийн сүлд минь гэж залбирдаг түүхэн уламжлал, бидний үнэт зүйл хаана байна? Мөн судлаач, шүүмжлэгч, ажиглагч нарын зүгээс ерөнхий сайд одоо л шударга хуулийн зарчим баримталж чадвал үндэсний баатар, эс чадвал үндэсний дайсан болох хоёр замын уулзварт ирээд байгааг онцолж буй юм.

Ерөнхийлөгчийн зүгээс ч төрийн тэргүүний суудалд сонгогдсоноос хойш нар харах завгүй нанчилдаантай улс төрийн замнал туулж яваа. Гэхдээ эрх баригчид албан тушаалын төлөө ийм хүнд хэцүү цагт хоорондоо өрсөлдөхөөс илүү туурга тусгаар улсаа хөл дээр нь хурдхан босгох, ядуурал, сүйрлийн ирмэгээс хөөрхий ард түмнээ бушуухан татаж, дэлхий дахинаа эрчимтэй уналтад ороод буй Монгол улсын нэр хүндийг сэргээн, гадаад харилцаагаа улам бэхжүүлж, хөрөнгө оруулалтын таатай орчин бүрдүүлж ажиллах шаардлага үүсээд байгаа нь тодорхой.