Монгол болон Япон улс хоорондоо дипломат харилцаа тогтоосны 50 жилийн ой энэ онд тохиож байна. Энэ хугацаанд хоёр улс хамтын ажиллагаагаа салбар бүрд өргөжүүлэн хөгжүүлэхийг зорьж, олон чухал хэлэлцээр, баримт бичгийг байгуулсан байдаг. Тухайлбал, 2015 оны хоёрдугаар сард Монгол, Японы хооронд Эдийн засгийн түншлэлийн хэлэлцээрийг байгуулж, 2016 оны зургаадугаар сарын 7-ноос хүчин төгөлдөр мөрдөж эхэлжээ.

Уг хэлэлцээрээр Монголын тал 5,700 орчим, Японы тал 9,300 орчим төрлийн бараа бүтээгдэхүүнийг импортын гаалийн тарифаас шууд болон үе шаттайгаар чөлөөлж байгаа юм.

Хоёр улсын гадаад худалдааны эргэлт энэ оны эхний 10 сарын байдлаар 588.9 сая ам.долларт хүрсэн нь өнгөрсөн оны мөн үетэй харьцуулахад 58 хувиар өссөн үзүүлэлт юм.

Манай улс Япон руу дээр дурдсан хугацаанд 12.4 сая ам.долларын экспорт хийжээ. Экспортын гол нэрийн бараанд хөнгөн цагаан, хөдөө аж ахуй, малын гаралтай бүтээгдэхүүнүүд дийлэнх хувийг эзэлдэг. Харин энэ оны эхний 10 сарын байдлаар манай улс Японоос 576.5 сая ам.долларын бараа бүтээгдэхүүн импортоор авсны нэлээд хувийг суудлын болон ачааны авто машин, нийтийн тээврийн хэрэгсэл болон нефтийн бүтээгдэхүүн эзэлж байна.

Сүүлийн үед Японы хөрөнгө оруулалтаар Монголд хийсэн томоохон бүтээн байгуулалтаас дурдвал Хөшигийн хөндий дэх нисэх онгоцны буудал, Монгол-Японы эмнэлэг зэргийг нэрлэж болно. Ерөнхийлөгч У.Хүрэлсүхийн Японд хийж буй төрийн айлчлалын үеэр Хөшигийн хөндийд дагуул хот байгуулахад хамтарч ажиллах саналыг тус улсад тавих юм байна.

2022 оны нэгдүгээр улирлын байдлаар гэхэд Япон улс манай оронд 133 сая ам.долларын хөрөнгө оруулалт хийжээ. Одоогоор Японы хөрөнгө оруулалттай 670 компани, аж ахуйн нэгж манай улсад бүртгэлтэй байна.