Монголын ард түмний эрх чөлөөний баталгаа Үндсэн хууль туршилтын шингэн биш дээ. МАН-ын үйл ажиллагаа хэрээс хэтэрч Үндсэн хуулийг засан сайжруулна гэж олон удаа өөрчлөөд үр дүнгээ ч өгөх эсэх нь тодорхойгүй байна. Үндэсний аюулгүй байдал, үндэсний үнэт зүйл, уламжлалын тулгуур Монгол түмний оршихуйг юу руу чирч байгаагаа ойлгодог эрхэм төрд, төрийн дагуулуудад байдаг уу?

Үндсэн хууль төр ард түмний харилцааг зохицуулдаг эрх зүйн баримт бичиг учраас бүх хүн юу яаж хэрхэн өөрчилж засч шинэчилж байгааг маш сайн ойлгосон байх нь маш энгийн учир зүй. Гэтэл зөвлөлдөх санал асуулга нэртэй хэдэн хүн суулгаж асуудлыг тун бүрхэг аргаар ерөнхийдөө эрх баригчдын хүслээр үйлдэх нь цаанаа ямар хор уршигтайг таах аргагүй.

Далимдуулан хуучин, шинэ олигархиуд төрийн сэнтийд заларч, өнө удаан тарвалзах арга сүвэгчлэн оготон шиг олбилзож, муур шиг гэтэх. Ардчилсан улсын шинжийг улам л алдагдуулсаар байгаа Монголын өнө хойчыг ямар ирээдүй хүлээв?

Эрдэмтэн судлаачид хэдий Монгол эх орноо гэх халуун сэтгэлтэн байвч эцэстээ эрх баригчдын цаламд өртөх нь гарцаагүй. Цөөнийг хумиж дураар хөдөлгөхөд амар, олныг хураах тун хэцүү. Ард түмэн өөрсдийнх нь хувь заяагаар, үр хүүхдиийнх нь гэрэлт ирээдүйгээр ямар наадгай зохиохоор муйхарлаж буйг нь анхааралтай ажиглаж байна. Ийм үед эх орны эздээс нь асуулгүйгээр тогтолцоог тонгорч, Үндсэн хуулийг үнгэж өөрчилж болно гэж үү?

Малыг хүнсэнд хэрэглэхдээ хөлийг нь хүлж, амыг нь барьж байгаад муулдаг. Ард түмнээ хэлэх үгийг нь хясаж, хийх үйлдлийг нь хямгадаж байгаад номхочлох нь дэлхийн үе үеийн түүхэнд дарангуйлал хэмээн нэрлэгдэж түүхэнд толбо, түмэнд шившиг болдог шүү дээ. Үндсэн хуулиа өөрчлөөд үнэхээр сайжирдаг бол үр дүнд хүрэх олон өөрчлөлт боллоо. Гэтэл хямрал цумрал улам л эрчлэгдэв. Намын эрх ашиг нийт үндэстнийхийг төлөөлж чадахгүй болсоор 30 гаруй жилийг үдсэн. Эрх чөлөөг угаасаа л ус агаар шиг шүтдэг монголчуудын хилэн хөдлөх вий.