Иргэдийн зүгээс 1072 хувьцааг цагаан сараас өмнө өгөхийг Засгийн газраас шаардаж буй. Тэгвэл уг асуудлаар ЗГХЭГ-ын дарга Д.Амарбаясалангаас тодрууллаа.

Тэрээр, "Өнөөдөр Эрдэнэс Тавантолгой компани дотооддоо 500 гаруй тэрбум төгрөгийн бонд босгосон өр байж байна. Төмөр замын төслийн хэрэгжүүлсэн санхүүжилтийн үлдэгдэл өр байж байна. Эдгээр өрүүдийг төлж барагдуулахгүй бол дараа жилээс алдагдалтай ажиллах нөхцөл бүрдэх учраас Засгийн газар, Эдийн засгийн хөгжлийн яамны зүгээс нэн тэргүүнд өр төлбөрийг нь барагдуулах бодлогыг хэрэгжүүлэх нь зүйн хэрэг юм. Энийг хэрэгжүүлснээр цаашдаа ард иргэдийн хувьцааг илүү үнэ цэнтэй байлгах тал дээр анхаарч ажиллах нь зөв юм гэж үзсэн.

Тухайлбал, 2021 оны ашиг нь 190 гаруй тэрбум төгрөг байсан. Үүнийг хувьцаа эзэмшигч нарт 1072 хувьцаа болгож тараахад нэг хүнд 15 мянга орчим төгрөг ноогдоно. 2022 оны ноогдол ашиг хэлбэрээр өгөхөөр иргэдийн оногдох ашиг нь 100 гаруй тэрбум буюу нэг хүнд 10 гаруй мянган төгрөг ноогдохоор байгаа юм.

Нэг иргэн энэ хэмжээний мөнгийг хувьцаа хэлбэрээр олгох нь ач холбогдолтой биш, харин эсрэгээрээ өргөн хэрэглээний бараа бүтээгдэхүүний үнэд өөрчлөлт орж, инфляц хөөрөгдөх магадлалтай байдаг учир Эдийн засаг, хөгжлийн яам нэн тэргүүний зорилгоо болгохгүй.

Харин хувьцааг илүү өгөөжтэй болгохын тулд өнөөдөр хэрэгжүүлж буй төсөл хөтөлбөрүүдээ алдагдалгүй хэрэгжүүлье, Эрдэнэс Тавантолгойн өр төлбөрийг нь барагдуулахад анхаарлаа хандуулъя гэж ажиллаж байна.

Эрдэнэс Тавантолгой компанийн жилийн нийт орлого нь 6-7 их наяд төгрөг. Иргэн бүрт хоёр сая төгрөг өгье гэж бодох юм бол нэг ч төгрөг зарлагадахгүйгээр Эрдэнэс Тавантолгойн орлогыг хувааж өгөхөөр болж байгаа юм. Тийм бодит боломж байхгүй" гэв.