Хөдөлмөр нийгмийн сайдаар томилогдоод удаагүй Т. Аюурсайхан гишүүнийг нүүрсний хулгайд холбоотойг хууль хяналтын байгууллагууд мэдэгдээд байсны дараа тэрвээр УИХ-ын гишүүнээс татгалзан шалгуулах хүсэлтэйгээ илэрхийлжээ. Харин шударга тавын нэг гэгдэж улс төрийн нэр хүнд нь багагүй өсөөд байсан түүний хувьд хар толбо болох нүүрсний хулгайд холбоотой гэх хэрэг нь чухам яаж шийдэгдэхийг харах л үлдлээ.

Төрийн өндөр албан тушаалтан өөрийн хүсэлтээр бүрэн эрхээсээ түдгэлзэн шалгуулахаар болсон цөөхөн тохиолдлын нэг болоод байгаа эл үйлдлээ Т.Аюурсайхан өөрөө тайлбарлахдаа “улс төрийн зорилготой, зохион байгуулалттай гүтгэлэг” гэсэн бол хэвлэл мэдээллийн байгууллагуудын мэдээллэж буйгаар түүнийг АТГ яллагдагчаар татан шалгуулах хүсэлт гаргаад байгаа аж.

Үүгээр ч зогсохгүй “Эрхэт Монгол” групп, Х. Мандахбаяртай холбоотой ба хамаарал бүхий этгээдүүд нь нүүрсний хулгайн мөнгийг угаасан байж болзошгүй хэмээн шалгаж буй гэх. Үнэхээр Т. Аюурсайхан хонины арьс нөмөрсөн чоно байв уу. Нүүрсний хулгайн асуудал сөхөгдөн эрчээ авсан цагаас хойш нэр дурьдагдсан бүгд л буруугүйгээ нотлох мэдэгдэл удаа дараа хийсээр л. Гэтэл хууль хяналтын байгууллага авлига, албан тушаалын өндөр дүнтэй гэм хэргүүдийн араас харьцангуй ч нягтаар ажиллах яг өнөөгийн нөхцөл байдлаас авч үзвэл Т. Аюурсайхан цагаан бээлий өмсөж төрийн зүтгэлтэн царайлсан хулгайн сэтгэлгээтэй хар гартан байв уу гэдэг нь цагийн аясаар тодрох юм.