Аливаа баярын өмнө хэрэглээний үний өсөлт цадигаа алддаг ч энэ удаагийн цагаан сарын баярын өмнөх үнийн өсөлт хэрээс хэтэрлээ. Ахмадын тэтгэвэрийн мөнгө дөнгөж 500 мянга бол ууцны үнэ 400 мянга УИХ-ын гишүүдийн нэг өдөр бинзен хийх мөнгөөр хөөрхий ахмадууд ийнхүү цагаан сарынхаа баярыг тэмдэглэж хүрэхгүй байдалд байна.

Үнийн өсөлт, инфляцтай уялдуулан тэтгэвэр, тэтгэмж нэмэх асуудал яригдсан ч дэмжигдэхгүй. Хүчээ нэгтгэсэн МАН, ИХ-ын гишүүд өөрсдөө баяжиж ард түмнээ үнийн өсөлтийн дор доройтуулахыг юман чинээнд тоохгүй дүлий дүмбэ оргих нь намынх нь бодлого болчихсон ч юм шиг.

Нийслэлийн зах худалдааны төвүүдэд ширхэг хэвийн боов 4000 төгрөг. Бусад хүнсний бүтээгдэхүүн ч үнийн хөөргөдөлтэй хэвээр. Цагаан сар монголчуудын уламжлалт ёс заншлын хэлхээ, цогц, учир утга арвинтай баяр хэдий ч улсдаа насаараа хөлс хүчээ зориулсан ахмад буурлуудаа ийм өрөвдөлтэй байдалд байлгаж байгаа нь хэний буруу вэ?

Бусдад өртэй шинэ сараа угтахыг хатуу цээрлэдэг ёс бий. Гэвч уламжлалт баяраа тэмдэглэн ёс гүйцээхийг бодсон хэд хэчнээн өрх зээл авч, өр шир тавьж байгаа, түүнчлэн шар нар бор хоногийг арай ядан барж байгаа хэд хэчнээн өрх айл байга бол?

Үндэсний үйлдвэрийн бараа бүтээгдэхүүн зах худалдааны төвүүдэд мэр сэр байх ч тэнгэрт тулсан үнэтэйгээс иргэд худалдан авахад хэцүү. БНХАУ-ын Эрээн хотоос зүсэн зүйлийн эрээн мяраан бараа хямдхан авчирч гадагш монгол төгрөг шар усны үер шиг урсаж, ноён доллар, өнөөх юаны ханш тэнгэрт хадсанаас импортын хамааралтай эдийн засаг маань дахин өндийх аргагүй хямрах бололтой.