Энэ бол төр нийгмийн нэрт зүтгэлтэн, алтан хувьсгалын алтан хараацай Санжаасүрэнгийн Зориг агсан аль 1990-ээд онд хэлсэн үг. Төрд зүтгэж буй түшмэдүүд ард түмний салшгүй хэсэг бөгөөд үүнээс хэн ч зайлж чадахгүй гэдгийг хэлсэн хэрэг. Өөрөөр хэлбэл төр ард түмний хайр өршөөл дээр тогтдог хэр нь түшмэдүүдийн хувийн явцуу эрх ашиг нийтийн эрх чөлөөг боомилсон дархыг эдлэхийг эрмэлзэж гажуудлын үндэс болох шалтгаан болдог аж.

Улс түмнийг засаглахын тулд тэднээс баян, тарган тансаг хэрэглээтэй байх ёстой гэх туйлын тэнэг ойлголтоос үүдээд ертөнцөд өч төчнөөн хүүхэд өлсгөлөнгөөр нас барж, мөн төдий баячууд хөрөнгө мөнгөө юунд зарцуулж, хааш нь үрэхээ мэдэхгүй янцаглах зуур зарим ядуус өдрийн үмх хоолны төлөө байдаг хүчээрээ зүтгэж, шар нар бор хоногийг арай ядан туулж байна.

Төрийн хэмжээний хулгай луйвар улс орныг доройтуулж байгаа бол хуулийн засаглал, шударга шүүх, зангарагтай, холыг харж чадах зүтгэлтэн авралын од болох. Хэдий хамгийн ядарсан сонголт буюу хэн нэгнээс хэсэг бүлэг хүмүүсээс болж сэхэх аргагүйдсэн эдийн засаг, нийгэм улс төрийн хямралыг бас нэгэн улс төрчдөд даатгах хувьсгалын бус арга зам ард түмэнд байгаа бол нарийвчлан авч үзэх ёстой цөөн бус асуудал урхагаараа урган гарах юм.

Хамгийн түрүүнд уламжлалт үнэт зүйл, түүхийн уналт босолт, уруудалт доройтол, мандал, хүчирхэгжилтийн учир шалтгааныг ухаж ойлгох, судлах мэдэх зүй ёсны шаардлага бий болно. Монголчуудын төрөө хүндэтгэх нарийн нандин үнэт өв, уламжлалт арвин баялаг нөөц ном эрдмийн шим мандал бидэнд хэрэгтэй. Хэрвээ төр нь төр шиг чинхүү сэтгэлээ ардынхаа төлөө бодлогоор ажилладаг болвол түмний өөрсдийнх нь чинадын зовинол ч нимгэрэх болов уу.