Монголд хүнд үйлдвэр байхгүй учраас гаднаас машин оруулж ирдэг шат шатны олон дамжлага бүхий ченжийн нугалаатай машин импортын зах зээл байдаг. Он хуучинтай, хямдхан машиныг ард түмэн л явган таваргахгүй, халуун хүйтэнд зутрахгүй хөл дүүжлэх гэсэндээ худалдан авч гар дамжуулдаг. Харин баячуудын хэрэглээ, стандарт борчуудынхаас тэнгэр газар шиг ялгаатай.

Автомашины өндөр хэрэглээ агаарын бохирдол, түгжрэл бухимдалд ихээхэн нөлөө үзүүлж байгаа нь үнэн боловч ард түмний машинаас арай өндөр татварлан харин баячуудын он залуутай эсвэл бүр цоо шинэ цэмцгэр олигархуудын малгай машинуудад татвараас зайлах орон зайг нь яах гэж бэлдээд байгаа вэ?

Он хуучин ч хэрэглээ өндөртэй өч төчнөөн мянган машиныг торгож татварлаад хэрэглэгдэхээ больж утаа, түгжрэл уусах гэвэл эндүүрэл. Харин хотын түгжрэлийг бууруулах, машин механизмын үйлдвэртэй болох төслийг цаг алдалгүй боловсруулж хийвэл л үр дүн гарна. Жаахан асуудал томрох тусам л хорино цагдана, хураана, байцаана, хумина, авна гэх бүдүүлэг байдлаа өмнөө барих эрх баригчид талд түймэр, түйтгэр хоёрт хуйхлуулан махаа идэж буй хөөрхий ард түмнээ төрийн нөмөр нөөлөөгөөр халамжлах цаг атал хэрүүл шуугиан, хэтэрхий мэргэн жараахайн үлгэрээсээ ангижрах бололцоо олдохгүй шахам нь харамсалтай.