С. Зориг агсан гэрийнхээ босгоор давангуутаа алуурчдын мэсэнд өртөж нэгийг нь цохиж унагангуутаа хоёр гурваар нь зэрэг хутгалуулсан байж болзошгүйгээр хорь шахам удаа сүлбүүлж амиа алдсан байдаг. Энэ бол заавал алаарай гэсэн захиалга мөнийг бүгд мэддэг. Гагцхүү түүний амийг хэн хөнөөв? Хэнд ашигтай байв? Гэдэг нь асуултын тэмдэг хатгах асуудал мөн.

1998 оны 10 сарын хоёрны харанхуй шөнө Зориг агсны хөшиж амжаагүй цогцос дээгүүр харайлдан гэрт нь 70 гаруй хүн орохоос эхлээд л хэргийн ул мөр замхарсныг сонины нүүр болгонд бичиж байв. Харин 18 жилийн дараа түүний амь насыг хохироосон хэрэгт гурван хүнийг буруутган ялласан ч тэдний хоёрыг эрүүдэн шүүсэн баримт ил болж холбогдогчид өдгөө суллагдсан.

Тухайн үеийн хууль хүчний байгууллагуудын удирдлагууд хоорондоо арсалдан нэг нь нөгөөгөө эрүүдэн шүүсэн, эргүүтүүлэн хуурсан гэх сөрөг тайлбартайгаар өдий хүрчээ. Тэдний хэн нь ч өдгөө төрд эрх мэдэлгүй мөртлөө ийн асуудалд бие биенээ нөлөөлсөн байж болзошгүйг байнга ярих нь ямар учиртай вэ?

Угтаа бол хэргийн мөрдөн байцаалтын үед сэжигтнүүдийг эрүүдэн шүүж хэрэг хүлээлгэсэн нь тогтоогдсон юм бол эл асуудалд хэн ямар хариуцлага хүлээх вэ? Бусдыг эрүүдэн шүүх эрхийг хууль хүчний байгууллага өөртөө олгоогүй нь тодорхой. Харин С. Зориг агсны амь насыг хөнөөсөн, хөнөөлгөсөн хүмүүсийн аль нь ч хэргийг шалгах ажлын хэсэг 4 удаа тарж 32 хүнийг сэлгэсэнд буруутай эсэх нь ч хожим тусдаа асуудал.