ТББХ-ны 2023 оны 5 сарын 31-ны өдрийн хуралдаанаар СЕХ-оос программ хангамжийн асуудлыг шийдвэрлэхэд 21 тэрбум төгрөг шаардлагатайг онцолсон бол УИХ-ын дарга Г.Занданшатар сонгуулийг шударга явуулахын тулд хар машины асуудлыг шийдэхгүй бол болохгүй гэж протоколд тэмдэглүүллээ хэмээн 24tsag.mn/a/216577 лхагва гарагт мэдээлэв. Харин иргэд эдийн засаг, иргэдийн амьдралд дорвитой өөрчлөлт гараагүй, авлигалын асуудал хэрхэн шийдэгдэх нь тодорхойгүй үед их хэмжээний мөнгийг зөвхөн программ хангамж худалдаж авахад зориулах нь буруу хэмээн шүүмжилж байна.

Учир нь 2016 оны УИХ-ын сонгуулийн нийт зардал л 16 тэрбум ба үүнээс 2,3 тэрбум нь хар машины шинэчлэлд зарцуулагдаж байв. Зардал хэчнээн өслөө ч 21 тэрбумд хүрэх эсэхийг зохих албаныхан тогтоож, нарийвчлан мэдээлэх болов уу.

Араасаа хэл ам олныг дагуулж өдий хүртэл шуугиан нь намжаагүй шахам хар машины техникийн ажиллагааг зохих хууль журмаар хяналттай, сонгуулийн булхай луйврыг ч зүй ёсоор эмхлэх шаардлага урган гарлаа. Энэ удаагийн УИХ-ын сонгууль холимог тогтолцоогоор явагдах хэдий ч бүх эрх нэг намд дангаараа байгаа цагт тэнцвэр алдагдаж хууль тогтоомжийг биелэлт хангалтгүй түвшинд байх вий гэсэн хандлага их.