Ардчилсан нам удаан хугацааны муужралаас ангижирч арай гэж даргаа Дээд шүүхэд бүртгүүлсэн ч процесс нь хууль ёс хийгээд ардчилсан зарчим, намынхаа үндсэн дүрэм журамд нийцэхээргүйгээр үл барам Боловсролын сайдаар ажиллах явцдаа нэр холбогдсон асуудлууд нь баримттайн дээр эрх баригчдын сөрөг хүчнээ өндийлгөхгүй тактик ч нөлөөлж сэхэхээргүй цочролд ороод мөдхөн хуулийн байгууллагаар шалгагдаж, мэдээлэлд ойр байдлаа ашиглан өөртөө давуу байдал үүсгэх, эрх мэдэл албан тушаалын байдлаа урвуулан ашиглах гэх мэтийн эрүүгийн үндэслэлүүдээр байцаагдах болов уу.

Хэдий хүнд байдалтай ч Ардчилсан нам Монголын төрийг түшилцэх тулхтай намын хувьд тулгарах саад бэрхшээлийг даван туулах өөрийн үүрэг хариуцлагаа ухамсарлаж, засаглалын тэнцвэрийг хадгалж, төрийн дархлаа болох чиг шугамаа алдахгүй хүч хангалттай бий.

Хэдий 8 жил дараалан хэт цөөнх байхаас өөр аргагүйдсэн ч орон нутагт 8 аймагт олонх болохоор бас ч арга нь мухардах болоогүй ардчиллынхан ялангуяа Ардчилсан намыг өлгийнөөс өндийлгөсөн олон мянган гишүүд нь итгэл найдвараа чанга атгаж, зарчимдаа яс үнэнч хэвээр л байгаа. Өнөөгийн нөхцөлд эрх баригчдын авлигалаас бусад улс төрийн үйлдлүүдийг шууд туйлшран буруутгах аргагүй. Ямар ч улс төрийн хүчин сөрөг намаа эрх барих ээлжид дээрээ намнахыг л хичээдэг.

Өөрөөр хэлбэл Ардчилсан намын лидерүүд нь хүнд үед жирийн гишүүдтэйгээ үзэл санаа, үйл хэргээ нэгтгэх аваас уг нь эрх баригчдын ил цаламнаас мултарч, нийгэм эрүүлших хэцүү биш л баймаар.

Саяхны шуугианаар угаасаа 200 мянган гишүүдээсээ бус 200 хүрэхгүй ҮБХ-оор сонгогдсон Лувсаннямын Гантөмөрийг огцруулахаар аймаг дүүргийн намын хороод гарын үсэг цуглуулаад эхэлсэн гэх мэдээ улс төрийн хүрээнд чих шуугиулав. Арга ч үгүй биз эрх баригчид аль хэдийн Үндсэн хуулийг дайлаар мордчихоод өдгөө сонгуулийн хууль руу ханцуй шамлан орохтой зэрэгцэн МАН-ын даргын толгойгоо өргөх цаг үед салхины эргэлтийг тааруулан улс төрийн анхны мэдэгдэхүүнтэй хэн ч лидерээр зангидагдаж, үзэл санааныхаа хүчээр шалдан ч атугай заримдаа ялсаар ирсэн Ардчилсан намыг өөд татахаар зүтгэлгүй дээ.