Туу гэхээр хий боргодог ноход ихэвчлэн цэвэр цусных биш байдаг. Тэд чоно нохойтой нийлж золбирох улмаар хот руу дайрч мал амьтан сүйдлэх тохиолдол ч их. Монголын улс төрийн бохир талбар үүнтэй тун төстэй. Аливаа сенсацыг үүтгэж газар авхуулдаг төрийн түшээд цөөн биш атлаа асуудлын ул үндсийг үзэлгүй ямар нэг тохиролцоонд хүрч, эрх ашиг нь бүрдээд ирэхээр амаа үдүүлсэн юм шиг болдог. Нүүрсний хэргийг хав дарахаар зэхэх зарим гишүүдийн захиалгат замхруулалт, эрх баригч намын дээд удирдлагуудын нэр холбогдсон баримтуудтай зэрэгцсэн нь тохиолдол биш болов уу?

УИХ-ын гишүүн С.Ганбаатар л зогсоо зайгүй нүүрсний хэргийн нээлттэй сонсгол явуулахыг шаардах эрх баригчдын тачаалд одоохондоо таагүйцэх маягтай байна. Тиймдээ ч асуудал хойшилж байх шиг. Сонгууль ойртсон, дээрээс нь сайд нарынх нь үгэн тэнэглэл намынх нь нэр хүндийг улам сэглэх болохоор тэр.

УИХ-ын гишүүн асан Г.Уянга “Ерөнхий сайд Л.Оюун-Эрдэнэ нийгэмд сенсац дэгдээдэг баримт чулууддаг, илчилдэг, мэдээлэл өгдөг сэтгүүлчийн ажлаа одоо больж эрх баригч намын дарга, улсын Ерөнхий сайд гэдгээ харуулж авлигалчдад ял өгч, яллагдаагүйг нь шүүн хэлэлцэх цаг болжээ” гэх агуулгаар өөрийн цахим хуудаст бичжээ.

Үүнээс гадна олон нийгмийн зүтгэлтнүүд ч Монгол улсын эдийн засгийг ноцтой хохироосон авлигалын асар том бүлэглэл бүхий гэмт хэргийг эцэстээ яаж шийдэгдэхийг чихээ дэлдийж, нүдээ бүлтийтэл хүлээж байна. Ард түмний энэ их итгэл найдвар алдагдаж шударга ёс тогтохгүй нь нэгэнт тодорхой болбол хувьсгалын шинжтэй үйл хэрэг үүтгэгдэх ч магадлал нийгмийн сэтгэл зүй, нөхцөл байдлаар харагдсаар удлаа.