Нүүрсний хулгайн асуудлаар УИХ-ын хэдэн гишүүд тойрч суугаад ярих үеэр ХНХЯ-ны сайд Булгантуяа хэлэх гээд хэлэв үү? Хэл нь халтираад бурчхав уу. " Монгол Улс олон үндэстэн ястны улс. Америк, Австрали үнэт зүйлстэй байхад бидний үнэт зүйл хаачив…Нүүрсний хулгайчдын бөөнөөр нь шоронд хорих гэлээ. Улсаараа хэдэн хүнийг шоронд хорих нь үнэт зүйл байж болохгүй…" гэх мэтээр тэвдэнгүй ярьж хажуунаас гишүүд эсэргүүцсээр байхад улайрсаар дуусгасан үг өгүүлбэрийнх нь цаана ямар санаа агуулагдав?

Монгол бол олон үндэстний бус хоёрхон үндэстнээс бүрдсэн нэгдмэл цул улс. Харин Хятад 56 үндэстэн дотроо Монголыг оруулж тоолдог нь Өвөр Монголыг эрхшээдэг болохоор тэр. Угстааны хувьд яах ч аргагүй яс махны тасархай цагаан хэрэмний арын Монгол ахан дүүсээ тариачны улс гүрэнд алдаж захируулахад гадаад хүчин зүйлээс гадна дотоодын урвагч ноёдын балаг их байсан гэдэг.

Тусгаар улсын төрийн өндөр албан тушаалтан өөрийн төрөлх хэлээ үл хүндэтгэх мэт оюутнуудтай харь хэлээр дуржигнуулан элдвийг хүүрнэхдээ эх оронч үзэл, уламжлал соёлынхоо тухай, эх орноо хайрлан хамгаалах тухай ганхийгээгүйг түмэн харсан атал өдгөө Монголын эдийн засагт асар хохиролтой гэгдээд буй нүүрсний хулгай дээр дөрөөлөн "Монголчууд бол нүүрсний хулгайчдаа шоронд хийхийг мөрөөдөх дорой үндэстэн" гэж шууд ойлгогдохоор доромж утгатай зүйл ярьсандаа хүлцэл өчих нь бүү хэл "Би ч хэдэн зуун сая хүрэх нь ээ, намайг харлуулж байна…" гэж маягласан нь огцруулах үндэслэлийг нээгээд өгчээ.