1,5 сая хүнтэй нийслэл хот үерийн устаар түрэгдэн өтгөн шингэндээ автлаа. Байгалийн хүчин зүйлийн нөлөө их ч анхнаасаа төлөвлөлтийн алдаатай, авлигалын наймаатай газраар байшин барилга ихээр барьж усны голдирол урсац өөрчлөгдөн үерийн усанд хотыг автуулсан нь хэнд ч ойлгомжтой боллоо. Өнөөдрийн үйл явдлуудаас ажиглахад хотын удирдлагууд зохион байгуулалт болхи хэдий ч мэргэжлийн байгууллагуудын хүчин чармайлт, жирийн алба хаагчдын махруу зүтгэлээр хүний амь хараахан эрсдэлгүй ч эд хөрөнгийн хохирол тоймоо алдаж мэдэхээр байна.

Авлигалын үер байгалийн аадар хоёр нийлээд Улаанбаатар хотыг живүүлчих шахаж байхад эрх баригч намынхан төрийн нэрийг популизм болгож гамшгийн эрсдэлийн үед хүртэл өөрсдийн улс төрийн тоглолтоо хийгээд авч байгаа нь дэндүү харгис байлаа.

УОК, НОК хоёр дарга нарынхаа зохион байгуулалтаар л хангагдаад цэгцтэй ажиллаж байгаа үйл явц дээр хотын дарга, Ерөнхий сайд хоёр нэг их худлаа цэргийн дүрэмт хувцас өмсөж гарч ирээд сайн менежерийн дүрд тоглох хэр зохимжтой юм бол? Бас болоогүй камерын өмнө маасайж,шүүхийн тогтолцоог муулсан дүр үзүүлээд өнгөрсөн жилүүд рүү өнөөгийн бузар булайгаа цацаад хаячих…

Өрөвдөм энэ байдал дээр нэмээд авлига хорооллын аархуу баярхуу өнгөлөг мөнгөлөг эзэн хотыг усанд автуулах шалтгаан гэгдээд буй өөрийн эзэмшлийн барилгыг буруугүй мэтээр мэдэгдэл хийгээд авсан нь олон хүний эгдүүг хүргэжээ. Энэ бүхнээс нийслэлийн авлигалын хар сүүдэр борооны устай холилдон хот дундуур бодитоор урсахад улсаасаа хулгайлж баяжигч этгээдүүдийн арвин шунал аюулын хэмжээнээс хальжээ гэхэд хилсдэхгүй.