Халхын голын тулалдааны үеэр сувилагч хийж байсан, мөн Аугаа их Эх орны дайны үед Зөвлөлтийн дайчдад зориулан Монгол Улсын хүмүүнлэгийн тусламжийг фронтод хүргэх төлөөлөгчдийн бүрэлдэхүүнд багтсан Фронт Цэгмид хэмээн алдаршсан домогт монгол эмэгтэй Сүрэнхорын Цэгмид гуай саяхан 101 нас хүрэв.

Энэхүү чухал үйл явдлыг тохиолдуулан ОХУ-аас Монгол Улсад суугаа Цэрэг болон агаарын цэргийн атташе, хошууч генерал Павел Владимирович Петрунин Дундговь аймгийн Сайхан-Овоо суманд очиж Фронт Цэгмидэд биечлэн баяр хүргэж, мөн ОХУ-аас Монгол Улсад суугаа Онц бөгөөд Бүрэн эрхт Элчин сайд Алексей Николаевич Евсиковын чин сэтгэлийн мэндчилгээг уламжиллаа.

Хошууч генерал П.В.Петрунин төрсөн өдрийн баярын мэндчилгээ дэвшүүлэхдээ С.Цэгмид гуайг Монголaын бахархал төдийгүй Орос-Монголын найрамдлын домог, тэр байтугай дэлхийн хэмжээний домог, мөн Орост түүнийг сайн мэддэг, хүндэлдэг хэмээж, түүнд Оросын уламжлалт бэлэг болох Павлопосадын дулаан алчуур болон хохлома зурагтай модон аяга бэлэглэжээ.

Фронт Цэгмид хүндэт зочинтойгоо ярилцахдаа Х.Чойбалсан тэргүүтэй төлөөлөгчдийн бүрэлдэхүүнд багтаж Москвад очсон, мөн И.В.Сталин тэднийг хэрхэн хүлээж авч уулзсан тухай дурсав. Түүнчлэн тэрээр Зөвлөлт Холбоот Улс болон орчин үеийн Орос улсын тухай халуун дотноор ярьж, Монгол Улс мөнхийн хөрштэйгөө ойр дотно найзлах хэрэгтэй гэжээ. С.Цэгмид олон тооны шагналаа үзүүлсэн ч «Монгол Улсын гавьяат малчин» цол болон ОХУ-ын Ерөнхийлөгч В.В.Путины зарлигийн дагуу 2020 онд өөрт нь гардуулсан «Найрамдлын одон» гэсэн хоёр шагналыг онцгой бахархалтайгаар тэмдэглэв.

Фронт Цэгмид гуайтай өрнүүлсэн яриа хөөрөө маш халуун дотно, элэгсэг болж, Монгол орны өнцөг булан бүрээс 200 орчим төрөл төрөгсөд, хамаатан садан нь цугларсан түүний мэндэлсний 101 жилийн ойн арга хэмжээ өргөн цар хүрээтэй болж өнгөрчээ.