Нүүрсний хэрэг буруутгагдан шалгагдаж, шүүхээр хэлцэгдэж буй ЭТТ компанийн захирал Ганхуяг: -Нүүрсний 300 гаруй гэрээг шалгаач,энэ маш их хэмжээний баримт бүрдүүлсэн.ЭТТ-той холбоотой 200 гаруй тендер шалгаж баримт бүрдүүлсэн... Энд ярьж байгаа 11 хүний хэрэг нь 40 тэрбум хүрэхтэй үгүйтэй. Зохион байгуулалттай бүлэглэл энд байхгүй. Манай өмгөөлөгчид сүртэй юм яриад байна. Аюур "Эрдэнэс Тавантолгой"-г мэдэхгүй. Маш ноцтой юм энд яригдаж байна. МАН-ын асуудал яригдаад байна, энд.

220 мянган гишүүнийг энд авчраад шүүж байна. Манай намын дарга хаана байна…Гэх зэргээр 2023 оны 9 сарын 20-ны өдрийн шүүх хуралдааны үеэр ярьсан нь нийгмийн бухимдлын галыг өрдөв.

Монгол Улсын экспортын гол түүхий эд нүүрсийг төрийн өндөр албан тушаалтнууд, улс төрчид хулгайлж гадагш зөөвөрлөн хувьдаа завшсан асуудал нийгмийн анхаарлын төвд орсноос хойш багагүй хугацаа өнгөрчээ. УИХ-ын нэр бүхий гишүүд, улс төрчид олноороо нэр холбогдоод буй эл хэргийг хууль хяналтынхан хэрхэн шийдвэрлэхээс авлигатай тэмцэх цаашдын хандлага нь хуулийн хүрээнд улам эрчимжих нөхцөл болох нь.

Монголын эдийн засаг нүүрсний зах зээлээс хэт хамааралтай ч замаас нь улс төрчид, төрийн албаныхан их наядаар нь зувчуулдаг нь түүхэнд хар толбо болон үлдэх эмгэнэлт үеийг туулцгааж байна.

Авлигачдын хувьд 40 тэрбум төгрөг бага мөнгө байж болох ч энэ мөнгөөр нийгмийн олон эмзэг асуудалд цэг тавьж болохоор юм. Нүүрс хулгайлагч нарт 40 тэрбум төгрөг бага мөнгө юм бол Ганхуяг “жараахай” төдий юм байна.

Ингэхээр том “тул”-ууд их наядаар нь хулгайлсан нь бараг үнэн болж байх шиг байна. ЭТТ-н захирал Б.Ганхуяг золионд явахгүйн төлөө хэлж байгаа үг болгон нь ноцтой байна уу? “40 их наяд төгрөгөөр тооцогдох нүүрс хулгайлагдсан” гэж УИХ-ын гишүүн Т.Доржханд мэдээлсэн. Ямар баримтыг үндэслэн ийм тоо гаргаж ирсэн юм бол?

Энэ талаар түүнээс тодруулан нүүрсний хэрэг дээр нийтийн сонсгол явуулах нь Монгол Улс хэдий хэмжээний хохирол амсаад байгааг нарийвчлан тогтоох,олон нийтийн мэдээллээр хангагдах эрхийг орхигдуулахгүй байх шаардлагыг хэрэгжүүлэх юм.

Д.Энхбат