Эрх баригчдын зүгээс Үндэсний Аюулгүй Байдалд харшлах үйлдлүүд сүүлийн үед гарч байна. Хяналтгүй засаглал, хариуцлагагүй байдлын хурц илрэл болсон ядуурал ажилгүйдэл, үнийн өсөлтийг бууруулахад гараа ч хөдөлгөсөнгүй,мөрийн хөтөлбөрүүдээ хэрэгжүүлэхээ мартаж авилгалын хямрал, улс төржилтийн самууралд автсаар байна. Төрийн сайд нарын дэндүү алмай байдлын нэгэн жишээ нь малчдын аж амьдралд өнөөдрийг аргацааж маргаашийг сүйтгэсэн шийдлүүдийн нэг болох мал хөлөөр нь Хятад Улсад нийлүүлж буй удаа дараагийн амь аргацаалт болжээ.

Монгол малын арьс шир, ноос ноолуур, дайвар бүтээгдэхүүн зөвхөн амьдын жингээрээ тооцогдон огт үнэгүй гаднын зах зээлд нийлүүлэгдэж, мал аж ахуйн салбар хэмжээлшгүй эдийн засгийн алдагдалд орж байгаа хэрэг юм. Жилд дунджаар 10 сая орчим мал зах зээлийн эргэлтэд ордог тооцоо ойрын хугацаанд нэг их савлах тоо биш.

Дарханы арьс шир боловсруулах кластер үйлдвэрийн төсөл нь энэ салбарт үүсээд байгаа асуудлыг нэг мөр шийдэх үндсэн зорилготой байсан ч ямар нэг онцгой шалтгаангүйгээр төрийн зарим бүлэглэл асуудалд шууд гар дүрснээр үйлдвэр барих шат дамжлага таг гацсан юм.

Түүхий эд, бүтээгдэхүүнээ бусдад үнэгүй бэлэглэдэг төр засгийн газар байснаас татан буугдаж үндсээрээ тарж хариуцлага хүлээх ёстой. Үйлдвэрлэхээс залхуурч, үндэстнийг бэлэнчлэх сэтгэлгээнд уусган доройтуулан сүйтгэл рүү шууд чирч байгаа бүлэглэлтэй хариуцлага тооцох цаг болжээ.

Д.Энхбат