Хүн ерөөсөө үндэстнээр , улсаар оршдог , хүн төрөлхтөн ч тэр аяараа. Монгол үндэсний үзэл даяаршил хийгээд дангааршлын жин бангийн тэнцвэрт хөх толбот Монголчуудаа үеийн үед туурга тусгаар , эрх чөлөөтэй , аз жаргалтай амьдруулах л үзэл. Глобализм , либэрализм , социал - дэмократизм... үндэстнийг ярихгүй. Харин бүтээмжит үндэсний үзэл Монголчуудыг томруулна.Үндэсний үзэлд Монгол үндэстний үнэ цэнтэй бүхэн агуулагддаг.

Монгол үндэстэн бол ахуйн онцлог, нүүдлийн соёлоосоо хамааран унаган эрх чөлөөний сэтгэлгээтэй,дасан зохицох чадвараараа цолгорсон, оюун санааны бие даасан өгөгдөлтэй ард түмэн.

Үндэстний орших үндэс нь өөрийнхөө бие даасан үзэлд тулгуурлан хөгжлийн замаа тодорхойлох явдал. Монголчуудын тусгаар тогтнолоо хамгаалах, түүхэн ололт амжилтаа бататгах гол зарчмуудаа тодорхойлохын тулд түүхэн итгэл найдвараа олж авах, үндэстний эрмэлзлээ сэргээх,төрт ёсны уламжлалаа хадгалах,оюун санааны тусгаар байдлаа эрхэмлэх, эв нэгдлээ сахих шаардлага бий болжээ.

Монголчуудын ирээдүйн зам мөр ямар нэг “изм” биш өөрийн онцлогтой уламжлалдаа тулгуурласан хөгжлийн замыг тодорхойлохын зэрэгцээ эх түүхийн бахархал, харууслаас сургамжлан шинэ зорилтуудаа бий болгон үзэл санаандаа тусгаж хэрэгжүүлэх юм.

Монгол үндэстэн нийтээрээ сайн сайхан амьдрах, аж төрөх эрх чөлөөгөө эдлэх, уламжлалт үнэт зүйлээрээ бахархах, хамгаалах, эв нэгдлээ хангах эрхийг төр засгийн зүгээс ямар ч хориглолтгүйгээр хангаж өгөх үүрэгтэй. Харамсалтай нь энэ зарчим алдагдсаар байна.

Манжийн эрхшээлээс коммунизмын дарамт, коммунизмаас неолибериалзмын туршилтад амаргүй цаг үеийг туулж буй Монголчуудад үндэсний хөгжлийн замаа зөв сонгох шаардлага урган гарсаар уджээ. “Үндэсний үзлийн цөм нь үндэсний эрх ашиг байх ёстой”

Д.Энхбат