Манай улсын хилээр 2023 оны эхний есөн сард 3 879 (давхардсан тоогоор) мянган зорчигч нэвтэрсэн байна. Энэ нь өмнөх оны мөн үеэс 2 614 (3.1 дахин) мянгаар нэмэгджээ. Энэ оны эхний есөн сарын байдлаар 1 942 мянган зорчигч хилээр орсон байна. Тэдний

• 28 хувь нь Чингис Хаан,
• 26 хувь нь Замын-Үүд,
• 12 хувь нь Гашуун сухайт,
• 11 хувь нь Алтанбулаг,
• 5.3 хувь нь Шивээ хүрэн,
• 17 хувь нь бусад боомтоор оржээ.

Улсын хилээр орсон зорчигчдын 1 421 (73.2%) мянга нь Монгол Улсын иргэд, 521 (26.8%) мянга нь гадаад улсын иргэд байна. Улсын хилээр энэ оны эхний есөн сард гадаадын 521 мянган хүн орсон нь өмнөх оны мөн үеэс 299 мянгаар буюу 2.4 дахин нэмэгдсэн байна. Тэдний

• 89 хувь нь 30 хүртэл хоног,
• 2.5 хувь нь 60-аас 90 хүртэл хоног,
• 8.1 хувь нь 90, түүнээс дээш хоногийн хугацаагаар иржээ.

Энэ оны эхний есөн сард улсын хилээр орсон гадаадын зорчигчдын 486 (93.3%) мянга нь насанд хүрсэн хүн, 35 (6.7%) мянга нь хүүхэд, 293 (56.3%) мянга нь эрэгтэйчүүд, 227.7 (43.7%) мянга нь эмэгтэйчүүд байна. Хилээр орсон гадаадын зорчигчдын

• 54 хувь нь Зүүн Ази, Номхон Далайн бүс нутаг,
• 40 хувь нь Европ,
• 2.9 хувь нь Америк,
• 1.3 хувь нь Ойрх Дорнод,
• 1.0 хувь нь Өмнөд Ази, Африк тивээс иржээ.

Хилээр орсон гадаадын зорчигчдын

• 34 хувийг ОХУ-ын иргэд,
• 24.0 хувийг БНСУ-ын улсын иргэд,
• 19 хувийг БНХАУ-ын иргэд,
• 3.3 хувийг Казахстан улсын иргэд,
• 3.2 хувийг Япон улсын иргэд,
• 2.4 хувийг АНУ,
• 14.1 хувийг бусад улсын иргэд тус тус эзэлжээ.

Хилээр орсон жуулчдын тоо энэ оны эхний есөн сард 486 мянга болсон нь өмнөх оны мөн үетэй харьцуулахад 275 мянгаар буюу 2.3 дахин өссөн байна. Улсаар ангилбал энэ оны эхний 9 сарын байдлаар өмнөх оны мөн үеэс

• ОХУ-ын жуулчид 68.4 мянга буюу 67.3 хувиар,
• БНСУ-ынх 78.4 мянга буюу 2.7 дахин,
• БНХАУ-ынх 73.1 мянга буюу 11.6 дахин,
• Япон улсынх 11.4 мянга буюу 3.4 дахин тус тус нэмэгджээ.

Манай улсын 1 437.5 (давхардсан тоогоор) мянган иргэн энэ оны эхний есөн сард гадаадад зорчжээ. Тэдний 961 (66.9%) мянга нь аялал жуулчлалын зорилгоор зорчсон нь өмнөх оны мөн үеэс 680.8 мянгаар буюу 3.4 дахин өссөн. 475.9 (33.1%) мянга нь ажиллах, суралцах болон байнга оршин суух зорилгоор зорчсон нь өмнөх оны мөн үеэс 328.0 мянгаар буюу 3.2 дахин өсжээ гэж Үндэсний статистикийн хорооноос мэдээлэв.