Нийслэлийн Засаг дарга асан Д.Сумъяабазарын хэвлэлийн төлөөлөгчөөр ажиллаж байсан Н.Сугар үргэлжлүүлэн шинэ Засаг дарга Х.Нямбаатарын хэвлэлийн багийг ахлахаар болжээ. Тэрбээр энэ талаар өөрийн цахим хуудсанд “Нийслэлийн Засаг даргын хэвлэлийн төлөөлөгчөөр үргэлжлүүлэн ажиллахаар болсон. Намайг өндрөөр үнэлж санал тавьж, урьсан хүмүүстээ баярлалаа. Үнэндээ эргээд салбар руугаа явчихмаар л байлаа. Гэхдээ эхлүүлсэн ажлаа нэр төртэй дуусгах нь зүйтэй гэж үзлээ. Миний хувьд энэ цаг үед Улаанбаатар хот эргэлт хийж байгаа гэж итгэдэг. Тийм учраас энэ эргэлтэд өөрийн чадахаараа оролцож, үүрэг гүйцэтгэхийг хүсч байна.

Асуудал нь угжирч, бугшсан, цаашид хөгжиж чадах эсэх нь эргэлзээтэй болчихсон байсан Улаанбаатар хотын ирээдүйд боломж бий гэдгийг харуулж, илүү хурдтай, цэгцтэй, хөгжих суурийг Д.Сумъяабазар хотын даргаар ажиллах богино хугацаанд тавьсан. Барилга байшин, нүдэнд харагдах бүтээн байгуулалт биш болохоор одоохондоо олон нийт анзаарахгүй, ойлгохгүй байх шиг байна. Гэхдээ цаг хугацаа өнгөрөхөд маш чухал зүйлсийг эхлүүлсэн гэдгийг бүгд ойлгож, хүлээн зөвшөөрнө гэдэгт итгэлтэй байдаг.

Түүний эхлүүлсэн чухал ажлуудыг Нийслэлийн Засаг дарга бөгөөд Улаанбаатар хотын Захирагч Х.Нямбаатар ямар нэг эргэлзээгүйгээр үргэлжлүүлэхээ илэрхийлсэн. Олон жил гацсан үндэсний хэмжээний томоохон төсөл хөтөлбөрүүдийг хөдөлгөж чадсан "махруу" менежер Улаанбаатар хотын тулгамдсан асуудлыг цэгцлээд явах чадамжтай гэж харж байгаа. Тийм учраас чадахаараа дэм болно.

Богино хугацаанд олон ажлуудыг цэгцэлж, дуусгахаар маш хурдтай ажилдаа орсныг анзаарсан байх. Түгжрэл, төвлөрөл, нийслэлд бугшсан ашиг сонирхлыг цэгцлэх ажлыг хугацаа алдалгүй зэрэг зэрэг эхлүүлсэн. Одоогоор хурдыг нь гүйцэхгүй хоцрох, маягтай байна. Удахгүй жигдрэх юмандаа орчих байх өө.

Мэдээлэлд ойр байгаагийн хувьд, дотоод итгэл үнэмшил маань “Бид зөв зам дээрээ яваа” гэдэгт итгэлтэй байгаа. Тиймээс хэвлэл мэдээлэл, олон нийтэд мэдээллийг бодитой, шуурхай хүргэж ажилласаар байх болно” гэжээ.