“Цаг агаарын аюултай үзэгдэл болно. Малаа аль болох ойр бэлчээж гэр орондоо бага насны хүүхэд харгалзах хүнгүй орхиж болохгүй, цаг агаарын таагүй нөхцөл байдал төдий хугацаанд үргэлжлэх төлөвтэйг анхаарна уу” гэдэг мэдээлэл анхааруулгыг холбогдох байгууллагууд ямагт сэрэмжлүүлсээр байдаг.

Гэтэл малчид тэнгэр муудаж цаг агаарын байдал хүндрэх үеэр мал ахуйдаа явж байгаад, төөрч осгох тэр ч бүү хэл амь насаа алддаг харамсалтай тохиолдол гарсаар байна.

Аливаад ул суурьтай, анхаарал болгоомжтой хандах бололцоо хүн бүрд бий. Гэтэл ахуйн малчны аж амьдрал онцлогоосоо шалтгаалах нь олонтоо ч цаг агаарын байдалд тохируулан мал маллагааны горимоо зохицуулдаг байх зайлшгүй шаардлага тулгарсаар иржээ. Өдөр ирэх тусам техник технологийн хурдацтай хөгжлийг дагаад цаг агаарын мэдээ, аюулт үзэгдлийг сэрэмжлүүлж, мэргэжлийн байгууллагуудын анхааруулга мессеж иргэн бүрд хүрэх болсон.

Ийм үед асуудалд няхуур, ул суурьтай хандаж, цаг агаарын хүндрэлтэй цаг мөчлөгийг даван туулах арга ухаанаа гаргацгааж, мал маллагаандаа бодлогодоо онцгой нөхцөлийн горимыг дагаж мөрдөхийг өнгөрсөн өдрүүд дэх харамсалтай хэргүүдийн зарим баримтууд бэлхэн харуулж байна.

Амь наснаас илүү мал, хөрөнгө гэж үгүй. Цаг агаарын төлөв байдал эрс хүйтэрч, цасан бүрхүүл тогтсон өнөө үед мэргэжлийн байгууллагуудаас сэрэмжлүүлж байгаа мэдээ, мэдээллийг байнга чих тавин сонсож, ажил амьдралдаа мөрдлөг болгох нь зүйтэй.

Хэдий мал хөрөнгө хүний амьдралд чухал боловч цасан шуурганаар уруудсан малынхаа хойноос малчин хүн улайран хөөцөлдөж болохгүйн учир бол эрдэнэт хүний алтан амь юу юунаас чухалд оршино. Хэдий малчин ард түмний ахуй амьдрал цаг наргүй, амаргүй хөдөлмөрлөдөг онцлогтой ч цаг агаарын урьдчилсан мэдээгээ сайтар сонсож онцгой чиг үүргийн байгууллагуудын сэрэмжлүүлгийг тоохгүй, анзаардаггүй байдалдаа дүгнэлт хийх цаг болжээ.

Д.ЭНХБАТ