Нийслэл хотын зам дагуух шатахуун түгээгүүрийн гадаа хүмүүс маш олноороо машинтайгаа үдэш орой болтол дараалал үүсгэсэн хэвээр байна. УУХҮЯ-ны сайд нь Оросын энэ хориг ганцхан манай улсад ч биш өөр улсуудад үйлчилж байгаа гэж мэдэгдсэн нь бензин шатахууны хомсдол мөд арилах уу? үгүй юу гэдэгт хариулт хайхаас өөр аргагүй болж байна. Хүмүүс машиндаа жирэмсэн эхнэр, бага насны хүүхдээ суулгасан хэвээр колонкын гадна удаан зогсож байгаа дүр зураг ажиглагдаж байна.

Зарим эцэг эхчүүд хүүхдийнхээ товлолт вакциныг хийлгэх болсон учраас зайлгүй шатахуун хэрэгтэй. Машинаар явж эмнэлэгт хүрэхгүй бол нийтийн тээврийн бохир, эрсдэлтэй орчин нөхцөлд нялх хүүхдээ тэврээд зорчих аргагүй. Иймээс хүүхдүүдээ гэрт нь түр үлдээгээд бензин авахаар дараалан зогсож байгаагаа хэлж байв.

Удахгүй хомсдол арилж хэвийн хэмжээнд очно. Банкаа дүүргэлгүй бага бага авч аргацаах зөвлөмжийг хүртэл колонкууд өгч байгаа. Гэсэн ч 200-300 машин дараалан зогсож зарим нь шар гэрэл нь ассан эсвэл бүр унтарсан учраас саванд бензин авахыг хүссэн иргэд ч нэлээдгүй байна.

Түлш, шатахууны салбар бол Монгол Улсын төр засгийн анхаарах ёстой чухал асуудал. Шатахуун үйлдвэрлэх дотоодын үйлдвэртэй болж хараат байдлаас гарах бодлого нэн яаралтай хэрэгтэй болжээ. Зарим эх сурвалжийн мэдээлсэнчлэн түлш шатахуун импортлогч монопол эрхтэй компаниудын эзэд хуйвалдан засгийн газарт шахалт үзүүлж байна уу? гэх хардлага ч бий. Ямартай ч улс орны амин судас болсон түлш, шатахууны хомсдол арилж байж хөгжлийн гарц шийдэл илэрхийлэгдэх учиртай.

Д.ЭНХБАТ