Монголын бэлчээрийн малын мах дөрвөн улиралд өөр өөр амт чанартай, витаминлаг, шим тэжээлээ огт алдаагүй, эрчимжсэн буюу бордож таргалуулсан малаас эрс өөр. Гавьяат малчин Р.Мөнхбаярын ярьснаар “ Бэлчээрийн малын маханд холестерин, хортой бодис байхгүй. Өвөл, хавар эцэж тураад хамаг холестерин, хорт бодисоо гадагшлуулдаг. Эргээд зун намарт бэлчээрийн соргог өөрсдөө явж идээшлэн шим тэжээлээ нөхөж тэвээрэг авдаг. Бэлчээрийн малын маханд 108 төрлийн хүний биед хэрэгтэй бодис агуулагддаг гэдгийг судалгаагаар тогтоосон”.

Монголын бэлчээрийн мал аж ахуйг сууриншуулж, төвлөрүүлэн, эрчимжсэн нэрийн дор устгах бодлого буруу. Хүн ч ялгаагүй нэг газраа сууж зөвхөн идэж ууж таргалахаас өөр шидгүй байвал нас нь ахардана.

Иймд дөрвөн улирлыг аясаар нүүдэллэж оршин тогтнодог цогц соёл, ахуйн дархлааг устгах санаархлыг гүйцэлдүүлж боломгүй. “Нүүдлийн мал аж ахуй нь байгалийн бэлчээрт тулгуурлаж үйлдвэрлэлээ явуулдаг, нөхөн сэргээгдэж, төлжин үржиж, шилэгдэн сайжирч байдаг био-үйлдвэрлэлийн өвөрмөц салбар билээ. Энэ нь малчид байгальд зохицон түүний нөхөн сэргээх бололцоог хангаж чаддаг нь нүүдэлчдийн хүний нийгмийн хөгжилд оруулж буй үнэ цэн юм.”

Д.ЭНХБАТ