Улс төр анхнаасаа нийтийн эрх ашгийг эрэмбэлэх зориулалттай нийгмийн бүлгүүдийн харилцааг зохицуулагч хүчин зүйл байв. Улс төрд хувьдаа баяжих гэж орох нь аль хэдийн ард хоцорч хуучирсан соёлгүй, бүдүүлэг гэмт хэргийн шинжтэй үйлдэл боловч орчин үед улс төрийн бизнесээс дээртгэн ойлгож гэр бүл, хувийн бизнесээ өргөжүүлэх улмаар олигархи бүлэглэлийн ивээлд багтахыг хүсэгчдээр намуудын орон зай дүүрэх нь хэтэрхий гажуудал мөн. Шударга хөдөлмөрөөрөө хуулийн дагуу бизнес эрхэлж амжилттай ажиллах, нийгэмдээ хувь нэмрээ оруулах хэмжээнд ойртох бололцоо хуулийн хүрээнд хомс буюу төрийн шахалт татварын дарамтаас өгсүүлээд эрүүл орчин бүрдэхгүй, шударга өрсөлдөх боломжгүйддэг учраас улс төрөөр дамжин төрийн эрх мэдэл, нөлөөлөлд хүрч улмаар бизнесдээ шударга бус хөрс бэлтгэж, сонгуулийг ч хууль бус зах зээлийн нэг хэсэг болгох нь ард түмний эсрэг үйлдэж буй гэмт хэрэг юм. Аливаа гэмт хэргийн сэдэл төрж үйлдлээр илэрсэн л бол түүнийг хариуцлагад татах үндэслэл болдог. Улс төрчдийг нам, эвсэл болоод сонгуулийн үйл ажиллагаанд оролцуулахдаа шударга ёс, ариун нэр төрөө эрхэмлэх, Үндсэн хуулиа дээдлэх, авлига ашиг сонирхлоос ангид байх амлалтыг авч тангараг өргүүлэх хэрвээ тангаргаа зөрчвөл эрүүгийн хариуцлагад татдаг хуулийн систем хэрэгтэй. Хэрвээ ийм тогтолцоо бүрдүүлж эс чадвал төр өөрөө хулгайн замаар төрд шургалан улмаар улс үндэстнээ бүхлээр нь зарж чадах аймшигт гэмт хэрэгтнүүдийн үүр уурхай болжээ