Хүүхэд угаартаж нас барлаа гэх мэдээлэл байнга л гарч байна. Үүнд анхаарч байгаа УИХ-ын гишүүд нэг ч алга. Монгол хүн эрүүл аюулгүй орчинд амьдрах эрхээ Үндсэн хуулиар баталгаажуулсан. Гэтэл 2024 онд бидний сонгосон эмэгтэй гишүүд нийгмийг сэрдхийлгэсэн асуудалд дорвитой ажил хийсэн хүн алга.

Монголын уламжлалт сэтгэлгээнд эх хүний нинжин сэтгэл, өрх гэрээ зохицуулж, ахуй амьдралаа өөд нь татан үр хүүхдээ өсгөн хүмүүжүүлдэг үүрэг чухал байр суурьтай. Харин сүүлийн үед төрийн түвшний эмэгтэй УИХ-ын гишүүд эс үйлдлээрээ чамирхалдаа хэт анхаарал хандуулж хүчирхийлэл, аюул осол эндэгдлийн шалтгааныг бууруулах тал дээр амаа үдүүлчхээд буй нь олон нийтийн дунд шүүмжлэлд өртжээ.

Ирээдүйн эх орны эзэд үр хүүхдүүд хүчирхийлэл, осол, аюулын золиосонд бяцхан зүрхнүүд нь зогссоор атал энгэрээс нь сүү асгардаг эмэгтэй түшээд бүлх залгисан мэт таг дуугүй байсаар ирсэн нь эс үйлдлээрээ ирээдүйдээ анхаарал хандуулдаггүй харгис гэгдэнэ. Иймд төр нийгмийнхээ өмнө өргөсөн тангараг хүлээсэн үүргээ умартсан тэднийг дахин төрд залахгүй байх сонголт ард түмний гарт байна.

Хөтлөгч, сэтгүүлч, жүжигчин эмэгтэйчүүдэд төрийн жолоо ахдаж тэд дээлийн торго хээ хуар, архины шил ярьж эхлээд эцэстээ өөрсдөө нүүр амандаа филтер шахуулан гоо сайхны өндөр өртөгтэй үйлчилгээнд орж, шүдээ цайруулж, гадаад өнгө үзэмжиндээ л анхаарахаас бодлогын суурь босголцож тогтолцооны гажуудлыг засалцан дорвитой чамбай хуулийн төсөл санаачилж өргөн мэдүүлэн батлуулсан зүйлс нэгээхэн ч ажиглагдсангүй. Дультраа хэлтэй, дутуу мэдлэгтэй, хандлага буруутай, харгис хүйтэн сэтгэлтэй төдийгүй хүлээсэн үүрэг өргөсөн тангарагаа умартах тэдэнд өөрөөс бусад нь хамаагүй мэт бүгэх мөртлөө төрийн сэнтийг хөнжил дэвсгэр шигээ үзэх эрх байхгүй.