30 гаруй жил төрийн эрх мэдэл атгаж, өнгөрсөн 8 жилийн хугацаанд үнэмлэхүй олонхоороо сонгогдон засаглалын бүх шатанд хүчээ нэгтгэсэн эрх баригч намын 2020 оны мөрийн хөтөлбөрийг эргэн сануулъя.

“ИМОРТЛОГЧ УЛСААС ЭКСПОРТ УЛС…МАН-ЫН МӨРИЙН ХӨТӨЛБӨР 2020

2.2 2.2.1. Гол нэрийн хүнсний бүтээгдэхүүний хэрэгцээг дотоодын үйлдвэрлэлээр бүрэн хангана.

2.2.2. Үндэсний аж үйлдвэрийн салбараа хөгжүүлж, 150,000 ажлын байр шинээр бий болгоно…”

Гэх зэргээр цааш үргэлжлэх мөрийн хөтөлбөрт эдийн засаг дахь экспортын хэмжээг өмнө байгаагүйгээр өсгөн хэрэглэгч улсаас үйлдвэрлэгч орон болгох мөрөөдлийн амлалтууд хөвөрсөн ч өдгөө бид урд хөршөөс 90 гаруй хувийн хамааралтай хэвээр л байна.

“ӨРИЙН ДАРАМТГҮЙ МОНГОЛ УЛС 2.5.1. Валютын нөөцийг нэмэгдүүлэх, инфляцын түвшинг багасгах, төгрөгийн ханшийн уналтыг зогсоох зэрэг мөнгөний зохистой бодлогыг үргэлжлүүлэн хэрэгжүүлнэ.

2.5.2. Ардчилсан намын эрх барьж байх үеэс эхлэлтэй Мазаалай бондын 500 сая, Чингис бондын 1 тэрбум, Гэрэгэ бондын 800 сая, Хуралдай бондын 600 сая ам.долларын тулгамдсан өрийн дарамтаас гарна.”

Аливаа улс төрийн нам улс дотроо хуваагдал үүсгэж, Үндэсний аюулгүй байдлын асуудлыг улс төрийн суртал ухуулга хэлбэрээр ашиглаж болдоггүй.Өөрөөр хэлвэл Засгийн газрын хэрэгжүүлсэн бодлогыг аль нэг нам нь сөрөг хүчиндээ сөрөг талыг нь нааж муухай харагдуулах зорилгоор мөрийн хөтөлбөртөө хүртэл нэрийг нь дурьдаж суртал ухуулгын хэлбэрээр ашиглах явцуу золбин хандлага, соёлыг түгээсээр байвал бид дэлхий дахинд үндэстэн дотроо уралцдаг өрөвөлтэй тэнэг хэвээр л харагдана.

Өрийн дарамтаас улс эх орноо гаргах амлалтыг олон жилийн турш мөрийн хөтөлбөр болгондоо багтаадагч эрх баригч намын нэг ч бодлого хөтөлбөр өрх гэр бүлийн өр, зээлийн асуудлыг цэгцлэх тал дээр бодит үр дүнд хүрч байсангүй. Монголд хэт баян, хэт ядуу гэсэн хоёр туйлт эдийн засаг тогтож байгаа учраас зааг ялгааг арилгах зорилт дэвшүүлэх оновчтой сонголт болох хэдий ч эдийн засаг дахь олигархи түвшний асуудлыг шийдсэнээ ард түмний зовлонг нимгэлсэн баатрын дүрээр чээжээ дэлдэх нь тун өрөөсгөл ажээ.

Эдийн засагт голлон нөлөө үзүүлдэг ам долларын ханш 2012 оны 6 сард 1328 төгрөг байсан бол 2024 оны сард энэ тоо 3376 төгрөг болж хоёр дахин нэмэгджээ. Долларын ханшийг бууруулах, үйлдвэрлэл бүтээмжийг дэмжих, төгрөгийн худалдан авалтыг нэмэгдүүлэх төсвийн гадаад валютын нөөцийг нэмэгдүүлэх тал дээр дорвитой арга хэмжээ авч ажиллаж чадаагүй энэ тоо харуулж байна.

Д.ЭНХБАТ