"Тогтвортой хөгжлийн зорилт 4: Чанартай боловсролыг дэмжих" зорилгын хэрэгжилт, цаашид авах арга хэмжээний талаарх бодлогын хэлэлцүүлэг Туушин зочид буудалд өнөөдөр зохион байгуулагдлаа.

"Мэргэжлээрээ ажилладаггүй 20,000 гаруй багш байна"

Энэ үеэр Боловсролын сайд П.Наранбаяр "2010 оноос хойш багш мэргэжил эзэмшиж бэлтгэгдсэн 20,000 гаруй хүн одоо мэргэжлээрээ ажилладаггүй. Тиймээс багш нарын эрэлт их байгаа.

Өнөөдрийн төсвийн хэмжээнд багшийн цалинг нэмэгдүүлэхээр хандаад явж байна" гэлээ.

НҮБ-ын Хүүхдийн сангийн Ази, Номхон далайн бүсийн Боловсролын зөвлөх Мицүэ Уэмура "Монгол Улс тогтвортой хөгжлийн дөрөвдүгээр зорилгыг биелүүлэхэд ахиц дэвшилтэй явж байгаа.

Дотоодын Нийт Бүтээгдэхүүн (ДНБ)-ийхээ 4-5 хувийг боловсролын салбарт зарцуулж байна. Засгийн газрын нийт төсвийн 20 хувийг боловсролын салбарт зарцуулж байгаа нь бусад улс орнуудтай харьцуулахад сайн үлгэр жишээ. Гэхдээ Монголын боловсролын салбарт тулгамдсан хэд хэдэн асуудал бий.

Статистик мэдээллээс харвал монгол хүүхдүүдийн суурь ур чадвар тааруухан байна. Жишээлбэл хоёрдугаар ангийн хүүхэд эх хэлээ уншиж, ойлгох үзүүлэлт нэлээд доогуур.

Ази Номхон Далайн бүс нутгийн улс орнуудын 50 хувь нь ийм асуудалтай. Цахим шилжилтийг боловсролын салбарт сайн, зөв хийж буй бодлого" гэлээ.

"Хамгийн гол нь чанар тулгамдсан асуудал"

Үргэлжлүүлэн "Боловсролын төсөв дотроос 10 хувийг нь Сургуулийн Өмнөх Боловсролд зарцуул гэсэн олон улсын зөвлөмж байдаг.

Хүүхдэд багаас нь суурь ур чадвар, мэдлэг, боловсрол, суралцах чадвар зэргийг нь суулгаж өгөхгүй бол дараа дараагийнхаа үе шатанд бүр ч хэцүү болно.

Монголын тухайд цэцэрлэгт бүх хүүхдийг хамруулах чиглэлд хөрөнгө оруулалт хийж байна. Хамгийн гол нь чанар тулгамдсан асуудал гэж харж байна.

Цэцэрлэгийн насны, бэлтгэл ангийн хүүхдүүдэд хамгийн сайн мэдлэг ур чадварыг тухайн үед нь л олгохгүй бол дараа дараагийн ангиудад хэцүүднэ.

Хоёрдугаар ангийн хүүхэд ийм ийм ур чадвартай байх ёстой гэхэд Монгол Улс нэлээд доогуур үзүүлэлттэй харагдаад байгаа. Юу ч болсон бай боловсролын салбар тэсвэртэй, даан туулах чадвартай байх шаардлагатай" гэлээ.

IKON.MN