УИХ дахь АН-ын бүлэг ээлжит хуралдаанаа хийж, хэлэлцсэн асуудлуудын талаар бүлгийн дарга О.Цогтгэрэл, УИХ-ын гишүүн Ч.Лодойсамбуу, Б.Жаргалан нар мэдээлэл хийв.

Энэ үеэр тус намын бүлгийн гишүүн Б.Жаргалан "Төсвийн хэлэлцүүлэг хариуцлагагүй явагдсан. Ялангуяа мэргэжлийн Байнгын хороо болох Төсвийн байнгын хорооны дарга Ц.Даваасүрэнд хариуцлага хүлээлгэх саналыг манай намын бүлгээс гаргаж байгаа. Мөн удахгүй хэлэлцэх төсвийн тодотгол дээр АН-ын бүлэг ямар байр суурь баримтлахаа ярилцаж ажлын хэсэг байгууллаа. УИХ арваннэг, арванхоёрдугаар сард дахиад л улсын төсөвтэй зууралдахаар болж байна" гэв.

Ч.Лодойсамбуу гишүүн "АН-ын бүлэг өнөөдрийн хурлаараа бүлгийнхээ дүрмийг баталлаа. Цаашдаа бүлэг тодорхой асуудлуудаар нэгдсэн байр суурь илэрхийлээд явна. УИХ-ын чуулганы хуралдааны дэгийг ярихгүй бол болохгүй байна. Тухайлбал, өнгөрсөн баасан гаригт УИХ-ын дарга байгаа дэгийн хуулийг мөрдүүлэх бус зүйл заалт зохиож уншсан. Өнгөрсөн хугацаанд дэгийн хуулийг мөрдүүлэхдээ дур мэдэж шийдвэр гаргасаар ирлээ. Төхөөрөмжний нэр барьж удаа дараа дахин дахин санал хураалгаж асуудлыг шийдвэрлэж байна. Тиймээс УИХ-ын даргад тодорхой хариуцлага хүлээлгэх ёстой гэсэн байр суурьтай байна" гэж мэдээлсэн юм.

Харин УИХ дахь Ардчилсан намын бүлгийн дарга О.Цогтгэрэл "АН-ын бүлгийн дүрмийн дагуу зарим асуудалд л нэгдсэн байр суурь илэрхийлнэ. Түүнээс бус бүх асуудлаар нэгдсэн байр суурь илэрхийлнэ гэсэн үг биш. УИХ-ын чуулганы хуралдааны дэгийн тухай хуульд өөрчлөлт оруулах ажлын хэсэг гарчихсан ажиллаж байгаа. Төсвийн байнгын хорооны дарга Ц.Даваасүрэнд хариуцлага хүлээлгэх асуудлаар санал хураалт явуулахад манай бүлгийн гишүүд дэмжсэн. Гэхдээ Байнгын хорооны даргад хариуцлага тооцох асуудлыг Байнгын хороо нь дотроо шийдэх юм билээ. Энэ асуудлыг АН-ын бүлгээс тавихаар болсон" гэлээ.