Сирийн огцорсон Ерөнхийлөгч Башар аль-Ассадын Дамаск дахь гол ордны ойролцоох гаражид буй автомашины цуглуулгын дүрс бичлэг ил болжээ. CNN-ийн баталгаажуулсан нэгэн бичлэгээс Дамаскийн баруун хэсэг, Аль-Маззе хорооллын хойд талд байрлах томоохон агуулахад 40 гаруй тансаг зэрэглэлийн автомашин байгааг харж болох аж.

Энэхүү дүрс бичлэгээс харахад, тэдгээр тансаг зэрэглэлийн автомашинуудын дунд улаан өнгийн, голдуу 3 сая ам.доллараар зарагддаг “Ferrari F50”, Lamborghini, Rolls Royce, Bentley зэрэг автомашинууд байгаа аж. Нэг машин нь Дамаскийн дугаартай.

Босогчид томоохон хэмжээний давшилт хийх үед эх орноосоо гарч явсан Сирийн Ерөнхийлөгч Башар Асад гэр бүлийн хамт Москвад ирсэн гэж Оросын төрийн мэдээллийн ТАСС агентлаг Кремль дэх эх сурвалжийн мэдээллээс эш татан мэдээлсэн.

Эх сурвалж “Асад гэр бүлийн хамт Москвад ирсэн. Хүмүүнлэгийн үүднээс ОХУ тэдэнд орогнол олгосон” гэж хэлсэн байна.

Мөн өдөр BBC агентлаг “Flightradar24” цахим хуудасны мэдээлэлд хийсэн дүн шинжилгээнд үндэслэн Оросын нисэх онгоц Латакиа мужаас хөөрснийхөө дараа Оросыг чиглэн ниссэн гэж мэдээлжээ.

“Уг онгоц Хмеймим дэх Оросын цэргийн баазаас, эсвэл Латакиагийн нисэх онгоцны буудлаас хөөрсөн байж магадгүй. Нисэх онгоцны транспондерийг Москва хотын ойролцоо хэсэг хугацаанд асааж, буухаасаа өмнө дахин унтраасан” гэж ВВС мэдээлсэн байна.

Үүний зэрэгцээ олон улсын хэвлэлүүд Сирийн далбааг ОХУ дахь Сирийн Элчин сайдын яамны байрнаас буулгасан болохыг харуулсан зургуудыг интернэтэд нийтэлсэн. Дипломат төлөөлөгчийн газрын нэр бүхий самбарыг мөн буулгажээ.

Оросын Гадаад хэргийн яам "Башар Асад “ерөнхийлөгчийн албан тушаалыг орхиж”, Сириэс явах шийдвэрийг гаргасан" гэж өмнө нь мэдээлсэн. Асад “эрх мэдлийг тайван замаар шилжүүлэн өгөх"-ийг үүрэг болгосон байна.

Тус яам "Орос улс эдгээр хэлэлцээнд оролцоогүй. Бид хүчирхийлэл үйлдэхээс татгалзаж, засаглалын бүх асуудлыг улс төрийн аргаар шийдвэрлэхийг уриалж байна" гэж онцолжээ.

Энэ хооронд Ерөнхийлөгч асан Башар Асадын Дамаск дахь ордныг хэт давруу үзэлт суннитүүдийн “Хайят Тахрир аль-Шам” бүлэглэл тэргүүтэй босогчид тонон дээрэмдсэний дараа Сирийн олон арван иргэн ордонд ирсэн гэж AFP агентлаг мэдээлэв.

Асадын үед Сирийн Ерөнхий сайдын албан тушаалыг хашиж байсан Мухаммед Гази аль-Жалали "Эх орноосоо зугтан гарсан Ерөнхийлөгчтэй ямар ч холбоогүй, Асад болон түүний гэр бүлийнхэн хаана байгаа, Дамаскийг яг хэзээ орхин явсныг мэдэхгүй" гэжээ.

Зэвсэгт бүлэглэлүүд 11 дүгээр сарын сүүлчээр Сирийн засгийн газрын цэргүүдийн эсрэг томоохон хэмжээний дайралт эхлүүлсэн. Тэд хэдхэн хоногийн дотор тус улсын хоёр дахь том хот болох Алеппо руу нэвтрэн орж, өөр хэд хэдэн томоохон хотыг хяналтдаа авсан байна. 12 дугаар сарын 8-нд Сирийн босогчид Башар Асадын дэглэмийг түлхэн унагасан гэдгээ төрийн телевизээр зарлажээ.

Эх сурвалж: CNN, DW
Б.ЖАРГАЛ