Евразийн эдийн засгийн холбоотой чөлөөт худалдааны түр хэлэлцээр байгуулах асуудал шуугиан тарьсан хэвээр байна. УИХ-ын гишүүн Д.Энхтүвшиний мэдээлснээр, худалдааны гэрээ хийх асуудал яригдах үед хийгдсэн судалгаагаар Монгол Улсад “ашиггүй” гэсэн дүгнэлт гарч байжээ.

Тэрбээр "Худалдааны хэлэлцээр маш нарийн шинжлэх ухаан юм билээ. Сэтгэлийн хөөрлөөр бус, маш нарийн судалгаа хийж байж хэлэлцээр хийх асуудал яригддаг. Өнгөрсөн хугацаанд Евразийн судалгаа хийгдээд, Монголд үр дүнгүй гэсэн судалгааны үр дүн гарсан.

Явцын хувьд олон нийтэд нээлттэй, ил тод байдал учир дутагдалтай байв уу гэж санагдаж байна. Энэ нь аж ахуйн нэгжийн хувьд таатай үзэгдэл биш. Учир нь бүтээгдэхүүн, үйлчилгээ явуулж байгаа аж ахуйн нэгж дөнгөж хөл дээрээ босож байна" гэв.

Монголын дотоодын үйлдвэрлэгчид ч энэ хэлэлцээрийг байгуулах асуудлыг хойшлуулж өгөхийг хүсч байгаагаа илэрхийлсээр байна.

“Өгөөж” ХХК-ийн захирал С.Түмэнгэрэл “Евразийн эдийн засгийн холбооны чөлөөт худалдааны хэлэлцээрийг хойшлуулахыг шаардаж байна. Энэ хэлэлцээр зурагдвал Монголын үндэсний үйлдвэрлэл тэр чигтээ нурах аюултай, олон мянган ажлын байр байхгүй болох эрсдэл үүснэ” хэмээн хэлэв.

Б.ЖАРГАЛ