Бөөрөлжүүтийн цахилгаан станцын туршилтын явцад осол гарч, засварын ажил эхэлжээ. Тодруулбал, тус цахилгаан станц ачаалалттай туршилт буюу галлагаа хийж, үе шаттай тогоо өгч эхэлж байх үед технологийн дамжлагад нь энэ сарын 10-ны өглөө осол гарч, яаралтай засахаар ажиллаж байгаа ажээ.

Улаанбаатар хот анх удаа дотоодын хөрөнгийн зах зээлд 500 тэрбум төгрөгийн бонд арилжаалж, үүнээс 300 тэрбум төгрөгийг Бөөрөлжүүтийн цахилгаан станцад хөрөнгө оруулсан.

Өнгөрсөн аравдугаар сарын 5-ны өдөр Бөөрөлжүүтийн цахилгаан станцын эхний блок 150 мВт хүчин чадалтай станцыг ашиглалтад орсон.

Энэ үеэр Хотын дарга Х.Нямбаатар "Монгол Улсын Засгийн газрын 2020-2024 оны үйл ажиллагааны хөтөлбөр, “Шинэ сэргэлтийн бодлого”-ын хүрээнд Төв аймгийн Баянжаргалан сумын нутаг дэвсгэрт Бөөрөлжүүтийн нүүрсний уурхайг түшиглэн цахилгаан станц байгуулахаар төлөвлөсөн.

Өнөөдөр бид уг төслийн эхний үе шатыг нээсэн сайхан үйл явдлын гэрч болж байна. Энэхүү эхний үе шатыг нээснээр 300 мВт-ын хүчин чадалтай цахилгаан станц, 71 км урттай 220 кВт-ын цахилгаан дамжуулах шугамыг бий болгох боломж бүрдлээ" гэж тодотгож байв.

Б.ЖАРГАЛ