АНУ-ын цагаачдын тухай статистик мэдээллээс харахад, тус улсад амьдарч буй монгол цагаачдын 28 хувь ядуурлын түвшнээс доогуур амьжиргаатай байгаа ажээ.

Бангорын их сургуулийн ахлах багш, эдийн засагч Б.Эрдэнэбат энэ талаар “Америк руу цагаачилсан монголчуудын маань 75 хувь бакалавр болон түүнээс дээш боловсролтой гэж бүртгүүлжээ. Энэ үзүүлэлтээр дэлхийн гурван өөр улсын цагаачид л биднээс илүү юм байна. ( https://lnkd.in/e_BJE68z).

Боловсролыг дипломоор хэмжих мэдээж асуудалтай. Түүнийгээ ашиглаад амьжиргаагаа залгуулж чадаж байгаа эсэх нь илүү дээр хэмжүүр.

Сургалтын чанар муу, сурсан юм үгүй бол дипломтой болох гэж олон жилийн турш ажил, хөдөлмөр бүрэн эрхлэхгүй байх нь бусдадаа дарамт болохын сацуу, хязгаарлагдмал нөөц бололцоогоо үр ашиггүй зарцуулж буй тул ядуурал, эдийн засгийн доройтлын эх сурвалж болдог.

Нийт америкчуудын 13 хувь ядуурлын түвшнээсээ доош амьжиргаатай байхад Азиас очсон цагаачдын хувь нь түүнээс бага, 11% байдаг. Гэтэл Монгол цагаачдын 28% нь уг түвшнээс доогуур амьжиргаатай байгаа ажээ ( https://lnkd.in/eR7hb4sZ ).

Америкийн улсын радиогийн дараах мэдээгээр тэгвэл цагаачилж очсон хүмүүс нь хамгийн их дээд боловсролтой гэх атлаа Америкт хамгийн их ядуу болчихдог улсаар Монгол шалгарч байгаа юм байна.

Энэ нь Монголын дээд боловсрол Дэлхийн жишиг, олон улсын стандартаас хэт хоцрогдсоны, мөн мэргэжлийн сургалт, ур чадварт илүү анхаарах ёстойн дохио байж болно.

Ямартаа ч уг мэдээг уншаад оюутнуудад цахим хичээлүүдийг маань (https://lnkd.in/eGsfNmv2, https://lnkd.in/e5SiSS5H) үзээч, сурах бичгийг маань (https://lnkd.in/e8Gn3ehi) уншаач, NRCC-ийн семинарт (https://lnkd.in/exGR3EyP) сууж байгаач гэж дахин уриалмаар санагдав. Төгсөж гараад, дэлхийн хаана ч очсон мэргэжлээрээ ажиллаж чадах мэдлэг, чадвартай болох нь зорилго шүү)" гэжээ.

Б.ЖАРГАЛ