Нийслэлийн прокурорын газраас хяналт тавьсан зарим хэргийн хяналт шийдвэрлэлт, явц байдлын талаар мэдээлэл өгөх үеэр Дүнжингаравын уулзварт болсон дэлбэрэлтийн хэрэгт яллах дүгнэлт үйлдэн шүүхэд шилжүүлсэн талаар мэдээллээ. Тус хэргийн мөрдөн шалгах ажиллагааг улсын мөрдөн байцаах албаны Хүнд гэмт хэрэгтэй тэмцэх хэлтэс дагнан явуулж, Нийслэлийн Прокурорын Газар(НПГ)-аас хяналт тавьжээ.

Мөрдөн шалгах ажиллагааны явцад цугларсан нотлох баримтын хүрээнд "Дашваанжил" ХХК-ийн удирдлага Н.Б болон компанийн ажилтан Ч.Р нарт хуульд нийцүүлэн гаргасан захиргааны хэм хэмжээний акт зөрчсөний улмаас тухайн үед замын хөдөлгөөнд зорчиж явсан дөрвөн энгийн иргэн, ажил үүргээ гүйцэтгэж байсан онцгой байдлын гурван алба хааг буюу нийт долоон хүний амь насыг хохироосон. Мөн ослын улмаас таван хүний эрүүл мэндэд хүнд хохирол учирсан, нэг хүнд хүндэвтэр гэмтэл учирсан, иргэдийн болон хуулийн этгээдийн эд хөрөнгөд хохирол учирсан асуудал мөрдөн шалгах ажиллагаагаар тогтоогдсон байна.

Гэмт хэргийн улмаас хохирсон хохирол, хор уршгийн хэмжээ 18.8 тэрбум төгрөг байгаа аж.

Тус хэргийн талаар НПГ-ын Хэрэг бүртгэх, мөрдөн шалгах ажиллагаанд хяналт тавих II хэлтсийн дарга Г.Гэрэлтуяа мэдээлэхдээ, "Мөрдөн шалгах ажиллагааны явцад нийт 8 төрлийн, 98 шинжээчийн дүгнэлт гаргасан. Осолтой холбоотой таван шинжээчийн дүгнэлт гарсан. Хавцаст хэрэгт цугларсан шинжээчийн дүгнэлтүүд болон бусад нотлох баримтууд дээр тулгуурлаан осол гарахад Patrol маркын машины жолоочийн буруутай үйлдэл байхгүй, харин "Дашваанжил" ХХК-ийн хөдөлмөрийн аюулгүй байдал алдагдсантай холбоотой уг гэмт хэрэг гарсан гэх дүгнэлт гарсан. Улмаар "Дашваанжил" ХХК-ийн удирдлага болон ажилтны Эрүүгийн хуулийн тусгай ангийн

• 10.6 буюу хүний амь насыг болгоомжгүйгээр хохироох
• 11.3 буюу хүний эрүүл мэндэд болгоомжгүйгээр хунд гэмтэл учруулах
• 11.5 буюу хүний эрүүл мэндэд хүндэвтэр гэмтэл болгоомжгүйгээр учруулах гэсэн зүйлчлэлээр яллах дүгнэлт үйлдэж хэргийг шүүхэд шилжүүлсэн" гэв.