Украины Ерөнхийлөгч Владимир Зеленский “Путин тун удахгүй үхнэ. Энэ баттай бөгөөд төгсгөл нь ирнэ” гэж мэдэгджээ. Тэрбээр өчигдөр Францын Ерөнхийлөгч Эммануэль Макронтой уулзсаныхаа дараа Парист сэтгүүлчдэд ярилцлага өгөх үеэрээ Путины эрүүл мэндийн байдал тун тааруу байгаа талаар ярьсан байна.

“Путин эрүүл мэндийн асуудлаас үүдэн зовж шаналж байна” гэсэн цуурхал олон жилийн турш яригдсаар ирсэн. Сүүлийн жилүүдэд 72 настай түүний нүүр хавагнасан, хөл нь чичирч, нүд нь улайсан харагдах болсон нь таамаглалыг улам бүр нэмэгдүүлж байна гэж “Daily mail”-д мэдээлжээ.

Тус мэдээлэлд, Путин 2022 онд тухайн үеийн Батлан ​​хамгаалахын сайд Сергей Шойгутай уулзах үеэрээ ширээ түшиж, сандал дээрээ бөхийн үгээ хэлж байсан. Түүнчлэн түүнийг тасралтгүй ханиалгаж, гар, хөл нь өөрийн эрхгүй салгалж байгаа мэт хөдөлгөөн хийсэн тухай мэдээллүүд ч гарч байв. Мөн хэд хэдэн удаа доголсон тохиолдол ч бий гэжээ.

Зеленский "Одоо Орост үзүүлэх дарамт шахалтыг багасгах, энх тайвны төлөө эв нэгдлийг сулруулах цаг биш" гэж хэлсэн байна. Мөн "Орос улс Америкийн энх тайвны төлөөх оролдлогыг үл харгалзан, мөргөлдөөнийг сунжруулж байна" гэж буруутгажээ.

Тэр "Орос улс энэ дайныг үргэлжлүүлэхийг хүсэж байна. Дайныг дуусгахын тулд бид Орост шахалт үзүүлэх хэрэгтэй" гэж хэлсэн байна.

Францын Ерөнхийлөгч Эммануэль Макрон "Оросын эсрэг авсан хориг арга хэмжээг цуцлах талаар бодоход эрт байна гэж мэдэгджээ. Тэрбээр "Эцсийн дүндээ хориг арга хэмжээг цуцлах нь гагцхүү олон улсын хууль тогтоомжийг дагаж мөрдөх ОХУ-ын сонголтоос шалтгаална" гэж хэлсэн байна.

Эх сурвалж: DAILY MAIL
Б.ЖАРГАЛ