Орон сууцны үнийн индекс (2023.I=1.0) 2026 оны 9 дүгээр сард 1.47 болж, өнгөрсөн оны мөн үеийнхээс 7.6, өмнөх сарынхаас 1.3 хувиар нэмэгджээ.

Шинэ орон сууцны үнэ ашигласан хугацаанаас хамааран өнгөрсөн оны мөн үеийнхээс 3.7, хуучин орон сууцных 8.8 хувиар нэмэгдсэн байна. Өнгөрсөн сарынхтай харьцуулахад шинэ орон сууцны үнэ 0.2 хувиар буурч, хуучин орон сууцных 2 хувиар нэмэгдсэнийг Үндэсний статистикийн хороо мэдээлэв.

Шинэ орон сууцны нэг м/кв талбайн дундаж үнэ энэ оны есдүгээр сард 4.78 сая төгрөг болж, Сүхбаатар дүүрэгт хамгийн их буюу 5.52 сая төгрөг байв. Үнийг өнгөрсөн оны мөн үеийнхтэй харьцуулахад Сонгинохайрхан дүүрэгт 14.8 хувь буюу 468.4 мянган төгрөгөөр нэмэгджээ. Харин хуучин орон сууцны нэг м/кв талбайн дундаж үнэ 4.86 сая төгрөг болж, Сүхбаатар дүүрэгт хамгийн их буюу 5.92 сая төгрөг байлаа. Хуучин орон сууцны дундаж үнийг өнгөрсөн оны мөн үеийнхтэй харьцуулахад Баянзүрх дүүрэгт 10.2 хувь буюу 428.9 мянган төгрөгөөр нэмэгджээ.

Орон сууцны нэг м/кв талбайн дундаж үнэ Сүхбаатар дүүрэгт төв талбай, 220 мянгат орчим 7.99 сая төгрөг байгаа нь хамгийн их, Сонгинохайрхан дүүрэгт 21 дүгээр хороолол орчим 3.31 сая төгрөг байгаа нь хамгийн хямд байлаа.

Туршилт тооцоогоор, энэ оны 9 дүгээр сард нэг өрөө орон сууцны нэг сарын түрээсийн дундаж үнэ 1.38 сая, 2 өрөө орон сууцных 1.97 сая, 3 өрөө орон сууцных 3.04 сая төгрөг байв. Түрээсийн нэг сарын дундаж үнийг байршлаар нь харвал, 1-3 өрөө байр Сүхбаатар дүүрэгт 1.65-3.63 сая төгрөг байгаа нь хамгийн их, Сонгинохайрхан дүүрэгт 1.10-1.71 сая төгрөг байгаа нь хамгийн хямд байлаа.