Манай редакц "Энержи Ресурс ХХК"-ийн 2025 оны 5-р сарын 21-ний өдөр олон нийтэд хандсан мэдэгдэлд дараах хариуг албан ёсоор хүргүүлж байна. Уг мэдэгдэлд манай хэвлэл мэдээллийн байгууллагын бэлтгэн хүргэсэн мэдээллийг "гүтгэлэг, зохиомол, улс төрийн зорилготой" хэмээн тодорхойлсон нь хууль зүйн болон ёс зүйн хувьд хүлээн зөвшөөрөхгүй бөгөөд бидний ашигласан эх сурвалжууд нь олон улсын нэр хүндтэй байгууллагуудын албан ёсны мэдээлэл болохыг үүгээр мэдэгдэж байна.

1. Бидний бэлтгэсэн нийтлэл, дүн шинжилгээ, мэдээллийн эх сурвалж нь дараах эх сурвалжуудад тулгуурласан:
− Fitch Ratings (2024): Энержи Ресурсийн 2025 онд гаргасан 350 сая ам.долларын бондыг "B+" түвшний, өндөр хүүтэй, эрсдэлтэй, дахин санхүүжилтийн зорилготой зээл хэмээн тодорхойлсон бөгөөд бондын нөхцөлд Ухаа Худаг уурхайн лиценз хүчингүй болвол 102% үнээр заавал эргэн төлөх нөхцөл багтсан талаар албан ёсоор мэдэгдсэн.

− Mongolian Mining Corporation (MMC)-ийн өөрийн тайлан (2025): Уг бондын баталгаанд Ухаа Худаг уурхайн лицензийг ашигласан нь заагдсан бөгөөд энэхүү мэдээлэл нь Хонгконгийн хөрөнгийн бирж болон Сингапурын SGX дээр бүртгэгдсэн санхүүгийн баримт бичгүүдэд тусгагдсан байдаг.

− HKEX (Hong Kong Exchange), SGX (Singapore Exchange): Бүх бондуудын нөхцөл, баталгаа, зорилго, зарцуулалтыг олон нийтэд ил тод болгосон баримт бичгүүд.

2. Энержи Ресурс ХХК-ийн мэдэгдэлд дурдсанчлан бид "төрийн эсрэг жагсаал, турхиралт зохион байгуулсан" гэх агуулгаар огт мэдээлэл түгээгээгүй бөгөөд компанийн өрийн бүтцийг олон нийтэд ойлгомжтой хэлбэрээр хүргэхийг зорьсон болно.
3. Тус компанийн "гүтгэлэг тараасан" гэх мэдэгдэл нь редакцын үйл ажиллагаанд хэт нэг талыг барьсан, үндэслэлгүй халдлага болох ба олон улсын үнэлгээний байгууллагуудын тайланг "гүтгэлэг" гэж үзэх нь эдийн засгийн мэдээллийн чөлөөт урсгалыг боомилсон ноцтой алхам гэж үзэж байна.
4. Манай редакц нь нийтлэл бэлтгэх явцдаа зөвхөн албан ёсны, олон улсын нотолгоотой эх сурвалжуудыг ашигласан бөгөөд эдгээр эх сурвалжуудын агуулгыг өөрчилж, мушгин гуйвуулсан зүйл огтоос хийгдээгүй болно.
5. Энержи Ресурс ХХК-ийн гаргасан мэдэгдэл нь хэвлэл мэдээллийн байгууллагын үйл ажиллагаанд заналхийлсэн, илт буруутгасан агуулгатай бөгөөд энэ нь Монгол Улсын Үндсэн хуулийн 16-р зүйлийн 17-д заасан "сэтгүүлчийн үг хэлэх, мэдээлэл түгээх эрх"-ийг хязгаарлах оролдлого хэмээн үзэж байна.

Эцэст нь, бид мэдээллийн аюулгүй байдал, эдийн засгийн бодит байдал, иргэдийн баялгийн өгөөжтэй холбоотой сэдвүүдийг хөндөж байгаагаа онцлон тэмдэглэж, иргэдийг шударга, үндэслэлтэй мэдээллээр хангах үүргээ үргэлж хүлээж ажилладаг болно. Манай редакц үүссэн нөхцөл байдалтай холбогдуулан хэвлэл мэдээллийн эрх чөлөөг хамгаалах хууль зүйн зөвлөх байгууллагуудтай хамтран дараагийн шатны арга хэмжээг авах боломжийг нээлттэй байлгаж байна. Манай редакц нь "Энержи Ресурс ХХК"-ийн 2024 оны 5-р сарын 21-ний мэдэгдэлд хариу өгч, олон нийтийн мэдээлэл түгээх үйл ажиллагааг үндэслэлгүйгээр гүтгэн буруутгасан үйлдлийг няцааж байна. Манай нийтлэлд дурдагдсан бүх мэдээлэл дараах албан ёсны олон улсын санхүүгийн эх сурвалжууд, үнэлгээний агентлагуудын ил тод тайлан, хөрөнгө оруулагчдад зориулсан баримт бичигт тулгуурласан болно.

1. Fitch Ratings
− Fitch Affirms MAK Expected IDR and Bond Rating at 'CCC(EXP)'
− Fitch Ratings - MMC Bond Overview
2. HKEX (Hong Kong Stock Exchange) болон MMC-ийн тайлангууд
− HKEXnews - MMC Bond Issuance
3. IFC (International Finance Corporation)
− IFC Project Disclosure - MCS Group Loan 2020
− IFC Project Disclosure - MCS Group Loan 2024
4. EBRD (European Bank for Reconstruction and Development)
− EBRD Project Summary Document - MCS Coca-Cola LLC
5. Other Financial Sources
− TipRanks - MMC Bonds
− Cbonds Database - MMC Debt Overview

Манай редакц нь аль нэг байгууллага, компани, улс төрийн хүчинтэй ашиг сонирхлын зөрчилгүй бөгөөд эдгээр эх сурвалж дээр үндэслэн олон нийтийн мэдэх эрхийн хүрээнд мэдээлэл бэлтгэсэн болно. Энержи Ресурс ХХК-ийн мэдэгдэлд дурдсанчлан бид уг компанийн улс төрийн эсрэг жагсаал зохион байгуулсан гэх мэт баримт нотолгоог дурдаагүй бөгөөд харин эдийн засгийн олон улсын зах зээлд тэдний оролцоог олон нийтэд хүргэх зорилготой байсан болно. Хэрэв тус компани бидний ашигласан эх сурвалжуудыг гүтгэлэг гэж үзэж буй бол энэ нь Fitch, IFC, EBRD зэрэг дэлхийд нэр хүндтэй байгууллагуудын албан ёсны мэдээллийг үгүйсгэж буй үйлдэл бөгөөд тэдгээр байгууллагуудын нэр хүндийг илтэд гутаасан ноцтой хэрэг болно гэдгийг сануулъя. Мөн бид мэдээллийн үнэн зөв байдалд бүрэн итгэлтэй бөгөөд хууль зүйн үндэслэлтэй тайлбар, баримтаар баталгаажуулсан болно.

Дахин анхааруулахад, манай редакцын зүгээс зөвхөн олон нийтэд мэдээлэл хүргэх сэтгүүл зүйн зарчмаар ажилласан бөгөөд энэхүү үйл ажиллагаанд ямар нэгэн зохиомол, турхирсан агуулга агуулаагүй болохыг албан ёсоор мэдэгдэж байна.