"Халхын гол. Бидний алдар нэр улам их-2025" нэртэй Орос-Монголын хамтарсан эрэл хайгуулын экспедиц Халхын голын байлдааны үеэр амь үрэгдсэн 48 цэргийн цогцсыг илрүүлжээ. Энэ талаар ТАСС агентлагт Оросын талаас экспедицийг ахалж буй, ОХУ-ын Засгийн газрын дэргэдэх Санхүүгийн их сургуулийн оюутны хайгуулын отрядын удирдагч Александр Орлов мэдээлсэн байна.

Александр Орлов “Нэг долоо хоногийн идэвхтэй хайгуулын ажиллагааны явцад бид нийт 48 цэргийн цогцос олсноос 36 нь Зөвлөлтийн улаан армийн цэрэг, тав нь монгол цэрэг, долоо нь Японы цэргүүд байлаа.

Японы цэргүүдийн цогцсыг Японы талд шилжүүлсэн. Цаашид олдсон бичиг баримт болон ДНК шинжилгээний үр дүнд тулгуурлан Зөвлөлт, Монгол цэргүүдийн хэн болохыг тогтоох ажил хийгдэнэ” гэж мэдээлжээ.

Тэрбээр мөн "Цаг хугацаа ба үе үеийн холбоо" сангийн дэд тэргүүний албыг давхар хашдаг байна. 2025 оны экспедиц нь оролцогчдын тоогоороо дээд амжилт тогтоожээ. Оросын талаас 130 гаруй хүн оролцсон бөгөөд 15 бүс нутгийг төлөөлсөн 30 мэргэжилтэн ажилласан байна. Тэдний дунд ОХУ-ын Батлан хамгаалах яамны Хятадад суугаа цэргийн дурсгалын ажлыг зохион байгуулах, хэрэгжүүлэх төлөөлөгчийн газрын дарга Андрей Кисенко багтжээ.

Экспедицийн удирдагчийн хэлснээр, Монголын талаас Монгол Улсын Ерөнхийлөгчийн аюулгүй байдал, батлан хамгаалахын асуудал хариуцсан зөвлөх, бригадын генерал Дашцэдэнгийн Баасандамба удирдсан. Монгол Улсын Батлан хамгаалах яам хайгуулын багийн аюулгүй байдлыг хангах зорилгоор дэлбэрээгүй тэсрэх бодисыг илрүүлж, устгах инженер-сапёрын бүлгийг томилсон байна.

Мөн Монгол Улсын Батлан хамгаалах яамнаас гурван удаагийн хоолтой, бүх шаардлагатай нөхцөл бүхий талбайн лагерийг байгуулсан аж. Үндэсний Батлан хамгаалах их сургуулийн 70 сонсогч эрэл хайгуулын ажилд үнэтэй хувь нэмэр оруулжээ.

Хил орчмын бүсэд хайгуулын ажлыг Монгол Улсын Хил хамгаалах ерөнхий газрын эрэлчид зохион байгуулсан бол Хууль зүй, дотоод хэргийн яамнаас шүүх шинжилгээний шинжээчдийг (криминалистуудыг) томилон оролцуулсан байна.

Экспедицийн удирдагч Александр Орлов "Монгол, Оросын мэргэжилтнүүд хамтран улаан армийн хоёр цэргийн нэрийг тогтоож чадсан. Энэ оны наймдугаар сараас есдүгээр сарын хооронд манай экспедицийн ажлын хоёрдугаар шат эхэлнэ. Энэ шатны гол зорилго нь Зөвлөлтийн Улаан арми болон Бүгд Найрамдах Монгол Ард Улсын Армийн оршуулга хийгдээгүй байлдагчдыг олж тогтоох явдал юм" гэж онцолжээ.

Дашрамд дурдахад, “Халхын гол: Бидний алдар нэр улам их-2024” олон улсын экспедицийн уулзалт болж, Халх голын тулалдаантай холбоотой түүхийн дурсгалт зүйлс, олсон олдвороо Дорнод аймгийн Халх гол сумын “Ялалт” музейд хүлээлгэн өгч байсан аж. Экспедицийн дарга А.В.Орлов мэдээлэхдээ Халхын голд байлдаж яваад сураггүй болсон нийт 2000 орчим орос цэрэг байгааг хэлжээ.

Эх сурвалж: TASS
Б.ЖАРГАЛ