Ши Жиньпин сүүлийн гурван өдөр Хятад улсын хамгийн ачаалалтай боомт хотуудын нэгд Азийн болон Дорнын олон удирдагчийг хүлээн авч, шинэ дэлхийн дэг журмын төлөвлөгөөгөө харуулах зорилготой, нарийн зохион байгуулалттай дээд хэмжээний уулзалт зохион байгуулав.

Одоо Хятадын удирдагч цэргийн сүр хүчээ гайхуулж, тэс өөр төрх харуулахаар зэхэж байна.

Тэрбээр лхагва гарагт Бээжингийн гол гудамж болох Чан Аньд хамгийн дэвшилтэт гиперсоник, цөмийн зэвсэг тээх чадвартай пуужингууд, усан доорх дронууд байршуулж, мянга мянган цэргийн албан хаагчийг жагсаахаар төлөвлөжээ.

Ши Жиньпиний хувьд энэ хэд хоногийн турш “зөөлөн” ба “хатуу” хүчний үзүүлбэрээр дамжуулж илэрхийлэх гол санаа тодорхой байна: Хятад бол дэлхийн дүрэм журмыг дахин тодорхойлохыг хүсэж буй хүч бөгөөд Барууны тогтолцоог сорихоос эмээхгүй юм.

Ши Жиньпиний урилгаар ирсэн төлөөлөгчдийн жагсаалт энэхүү мессэжийг улам тодотгож байна. Тус жагсаалтад Оросын Ерөнхийлөгч Владимир Путин, Хойд Солонгосын удирдагч Ким Жон Ун, Ираны Ерөнхийлөгч Масуд Пезешкиан зэрэг Хятадын найрсаг харилцаатай орнуудын удирдагчид багтаж байна.

Энэ нь мөн Америкийн стратегичдийн “АНУ-ын эсрэг үймээн самуун үүсгэгч холбоо” гэж үздэг дөрвөн орны удирдагчид анх удаа нэг арга хэмжээний хүрээнд цуглах гэж байгаагаараа онцлог юм.

Барууны удирдагчид Украины дайныг зогсоохын тулд Путинд шахалт үзүүлэхийг эрмэлзэж байгаа энэ үед энэхүү үйл явдал тэдэнд илүү тод харагдах нь.

Иран, Хойд Солонгос, Хятад, Оросыг Барууны зарим ажиглагчид АНУ-ын эсрэг шинэ холбоо гэж үздэг бөгөөд үүний гол шалтгаан нь Тегеран, Пёньян Москвад зэвсэг нийлүүлж, Хойд Солонгосын хувьд цэрэг илгээж буй бол Хятад улс дайнд нэрвэгдсэн Оросын эдийн засаг, үйлдвэрийг дэмжиж байгаа юм.

Ши Жиньпин эдгээр улсуудыг Хятадын хувьд бэлгэ тэмдэг бүхий өдрөө хажуудаа "суулгаж" байгаа нь Путинийг дайнаа дуусгахыг шахах бодит боломжтой нэг том гүрэн удирдагч гэж өөрийгөө харуулж, Барууны тогтоосон дүрмээр тоглохын тулд өөрийн нөлөөгөө ашиглахгүйгээ илэрхийлж байгаа хэрэг аж.

Ши Жиньпин, хамгийн удаан хугацаанд эрх барьж буй, Хятадын хамгийн хүчирхэг удирдагчийн хувьд, энэ бэлгэ тэмдэг ба цаг хугацаа чухал ач холбогдолтой байх нь ойлгомжтой.

АНУ-ын Ерөнхийлөгч Дональд Трампын үед Америк өөрийн эвсэл холбоотнуудыг дахин зохион байгуулж, дэлхий даяар, тэр дундаа найз нөхөд, холбоотнуудад хүртэл эдийн засгийн дарамт учруулсан глобал худалдааны дайн өрнүүлж буй.

Ши энэ нөхцөл байдлыг Барууны дүрэм, үнэт зүйлсэд тулгуурласан дэлхийн тогтолцоог эсэргүүцэж байгаагаа харуулах хамгийн онцгой боломж гэж үзэж буй бөгөөд энэ нь түүнд эерэг үр дүн өгч байгаа аж.

Эх сурвалж: CNN
Б.ЖАРГАЛ