Хан-Уул дүүргийн хоёрдугаар хороонд оршин суух 16 настай эмэгтэй Ш-ийн амь насыг онц хэрцгийгээр хөнөөсөн хэрэг 2024 оны зургадугаар сарын 21-ний өдөр гарчээ. Уг хэргийг 20 настай эрэгтэй Д архи уусан үедээ үйлдсэн болохыг тогтоож, хэргийг Мөрдөн байцаах албанаас прокурор руу яллах дүгнэлт үйлдүүлэхээр шилжүүлсэн байна.

Сэжигтэн Д дээрх үйлдлээ бичлэг хийж, гэрэл зураг аван баталгаажуулсан талаар хохирогчийн ээж цахимаар мэдээлснээр энэ хэрэг олны анхаарлын төвд ороод буй юм.

Монгол Улсын Ерөнхийлөгч У.Хүрэлсүх энэхүү онц ноцтой гэмт хэргийн талаар өөрийн цахим хуудсаараа дамжуулан байр сууриа илэрхийлэв.

Тэрбээр "Сүүлийн үед нийгмийг цочирдуулсан онц ноцтой гэмт хэргийн талаарх мэдээ мэдээлэл олон нийтийн дунд гарч, ард иргэдийг түгшээж буйд сэтгэл зовниж байна.

Энэхүү жигшүүрт хэргийн үнэн мөнийг олж тогтооход хууль шүүхийн байгууллага онцгой анхаарч, гэмт этгээдэд ял завшуулахгүй, гагцхүү хууль дээдлэх зарчмыг ягштал баримталж ажиллах ёстой.

Мөн үнэн бодит мэдээллийг цаг алдалгүй олон нийтэд хүргэх нь нэн чухал юм" гэжээ.

Б.ЖАРГАЛ