Христийн гаж урсгалд автсан талийгаач эмэгтэйн хүүхдүүд мэдээлэл хийлээ.

Энэ үеэрээ тэд: " Энэ шашны байгууллага нь Солонгос улсад “Шинчеонжи” буюу “Шинэ тэнгэр газар” гэсэн нэрийн дор үйл ажиллагаа явуулдаг бөгөөд Монгол Улсад ч мөн адил энэ нэрийн дор үйл ажиллагаагаа явуулж байна. Үүсгэн байгуулагч нь Солонгос улсын иргэн И Ман Хы юм. Солонгос улсад 10 гаруй жил үйл ажиллагаа явуулж байгаа бөгөөд 51 сая хүн амтай тус улсад 300 мянган дагагчтай, харин 3 сая хүн амтай Монгол Улсад 12 мянга орчим дагагчтай байдаг.

Сүмд шинээр хүн элсүүлэхдээ “хувь хүний хөгжлийн сургалт”, “Солонгосын виз гаргаж өгнө”, “сэтгэл заслын үнэгүй хөтөлбөр”, “гадаад хэлний үнэгүй сургалт” гэх мэт худал мэдээллээр хүмүүсийг хуурч элсүүлдэг.

Сургалтанд хамрагдсан хүмүүст Библийн сургалт явуулж, “Аха” тэмцээн зохион байгуулж, Библийн үг өгүүлбэр бүрийг задлан тайлбарлах хэлбэрээр хичээл заадаг. Энэ сургалтаар дамжуулан хүмүүст итгэл үнэмшил суулгах, сэтгэлзүйн нөлөөлөл үзүүлэх цогц үйл ажиллагаа явуулдаг. Сургалт нь өглөө, өдөр, орой гэсэн гурван ээлжээр, долоо хоногийн долоон өдөр тасралтгүй явагддаг.

Библийг итгэж эхэлсэн хүмүүст дараагийн шатны буюу “Хөрсний 8 хичээл” гэсэн сургалтанд суухыг ятгадаг. Энэхүү хичээлд “бурхан удахгүй бууж ирнэ”, “дэлхийн сүйрэл ойртож байна”, “бурханы шүүлт эхэлж байна” гэх мэт айдас төрүүлэх агуулгаар итгэгчдийг нөлөөлдөг. Тэд “манай сүмийн хүмүүс хэзээ ч үхэхгүй, хамгийн бага нь 600 жил амьдарна, мөнх амьдарна” гэх мэт худал зүйл хэлдэг.

Мөн “манай сургалтанд хамрагдвал дэлхийн Харвардын их сургуульд сурахтай дүйцэхүйц мэдлэг олж авна”, “манай сертификатыг үзүүлбэл дэлхийн хаана ч асуудалгүй ажилд авна” гэх мэтээр итгүүлдэг. “Дэлхий сүйрэх тэр мөчид бурхан та нарыг аврана, авралд багтаагүй хүмүүс Монголын том том дарга нар авралд багтахгүй учир алт мөнгө эд баялгаа барин та нараас өвдөг сөгдөн гуйх болно харин та нар цагаан хувцастай ариун хүмүүс болно” гэх мэт худал суртал ухуулга явуулдаг. Харин сургалтаас гарахыг хүссэн хүмүүст “чи нэгэнт энэ хичээлийг үзчихээд гарах юм бол тамд унана, зөвхөн чи биш үр удам чинь ч бас тамд унана. Яагаад гэвэл чи бурханы үгийг сонссон мөртлөө үл тоосон, тиймээс бурхан чамайг аврахгүй” гэж айлган сүрдүүлдэг. Сургалт өглөөний 08:00 цагаас оройн 21:00 цаг хүртэл өдөр бүр явагддаг. Хурлын үеэр пастор буюу “лидер” нь “би өмнө нь энэ сүмд итгэдэггүй, бүр тэднийг цагдаад өгдөг байсан, гэтэл тэд намайг авралд оруулсан, гадуур яригдаж буй бүх зүйл бол Сатаны явуулга, худал зүйл” гэх мэтээр хүмүүст итгэл төрүүлэх үг ярьдаг.

Энэ сүмд орсон хүмүүс эдийн засгийн хувьд ч, шашин шүтэх эс шүтэх эрх чөлөөгөөрөө ч хязгаарлагддаг. “Бурханы талаар муу юм ярьж, муу зүйл бодож болохгүй” гэж дарамталдаг. Өргөл барьц өгөхдөө орлогынхоо 10 хувийг өгдөг бөгөөд “хэрэв та бурхан руу хуурамч сэтгэлээр хандвал бурхан таныг хуурна, тиймээс өргөлөө байнга өгч бай” гэж дарамталдаг.

Энэхүү байгууллага нь үнэн хэрэгтээ шашны нэрийн дор мөнгө угаах, хүмүүсийн итгэл үнэмшлийг ашиглах үйл ажиллагаа явуулдаг газар юм. Сүмийн байгууллага гаднаа хаягтай, тодорхой мэдээлэлтэй байдаг ч "Шинэ тэнгэр газар" бол ямар ч хаяггүй, хүмүүс нь цуглах юм бол дотроос нь хаалгаа түгчихдэг. Ямар нэгэн асуудал гарвал шууд зугтахаар. Сүмдээ элсүүлэхдээ итгэгчийн дэлгэрэнгүй мэдээллийг авдаг. Үүнд орлогын эх үүсвэр, зээлийн мэдээлэл, ар гэрийн мэдээлэл гэх мэт хувийн мэдээлэл байдаг. Ар гэрийнхнийг нь үргэлж нэгдэхийг ятгаж итгэх, эс итгэх эрхэд халддаг. Өдөр бүр 06:00-00:00 цаг хүртэл хаагуур юу хийж яваа нь мэдэгдэхгүй алга болдог. Өргөл барьц гэж сар болгон авдаг. Дунджаар 12 мянган иргэн байдаг. Манай ээж гэхэд л сард 70 мянган төгрөгийн өргөл өгдөг гэж байсан. Хохирогч эмэгтэйн нөхөр сард 130 мянган төгрөг өгдөг гэсэн. Хохирогчдын групп бий.

Энэ групп-д байгаа хүмүүс дандаа нэрээ нууцалж бичдэг. Учир нь бүгд айдастай байгаа. Ар гэр, хамаатан садан, зээлийн мэдээлэл гээд бүгд бий. Яагаад хувийн мэдээллээ өгсөн юм бэ гэхээр угийн мод гэдэг шиг агийн мод болгож хамгаалалтдаа авдаг гэсэн гэж тайлбарладаг.

Өнөөдөр хамт хэвлэлийн бага хурал зарласан ч ирэхээ больсон нэг эгчийн ээж нь 70 настай. Нэг итгэгчээ татаж оруулаагүйгээс болж ээжийнх нь зүрх муудаж эмнэлэгт хэвтсэн гэсэн. Тиймээс ирж чадаагүй. "Та нар бурхнаа хуурах юм бол бурхан таныг хуурна" гэж номлодог. Сүмд итгэдэггүй хүн бүрийг сатан гэж ойлгуулдаг. Та яагаад өргөлөө өгөхгүй байна гэж үргэлж дарамталдаг. Итгэгчид 900 насална. Хүүхдүүдээ хамгаалалтад авахгүй бол сатан болно. Та нар заавал нэгдэх ёстой гэдэг. Өнөөдөр ээжийнх нь ажил бүтсэн бурхан надад тусаллаа. Өнөөдөр бурхан надад тусалсангүй, чиний дотор долоон сатан байна гэх мэтээр ярьдаг. Миний ээж биднийг хүүхдээ биш зүгээр л сатан гэж хардаг болсон. Залуучуудыг Америк явах шаардлагагүй. Манайд сурах юм бол бараг л Харвардын дипломтой болсон гэсэн үг гэж ятгаж оруулсан байдаг. "Шинэ тэнгэр газар" гэдэг газарт маш олон хохирогч бий." гэв.