“Сонирхогчдын эвсэл” Украины ОХУ-ын эсрэг явуулж буй хамгаалалтын дайныг үргэлжлүүлэн дэмжих байр суурьтай байгаа бөгөөд арваннэгдүгээр сарын 25-ны мягмар гарагт болсон онлайн хуралдааны дараа энэ дайныг дуусгах гарц шийдлийг хэлэлцэхэд Киев заавал оролцох ёстойг онцолжээ.

Тус уулзалтыг хамтран даргалагчид болох Германы канцлер Фридрих Мерц, Францын Ерөнхийлөгч Эммануэль Макрон, Их Британийн Ерөнхий сайд Кир Стармер нарын мэдэгдэлд “Аливаа шийдвэрийг Украины бүрэн оролцоотойгоор гаргах ёстой. Энэ нь Украинд урт хугацааны аюулгүй байдал, тусгаар тогтнолыг баталгаажуулж, НҮБ-ын дүрмийн зарчимд нийцсэн байх ёстой” гэж дурджээ.

Энэ баримт бичгийг Германы Засгийн газар тарааснаас гадна Их Британийн Засгийн газрын вэбсайт дээр нийтэлсэн байна.

Мэдэгдэлд дурдсанаар, онлайн уулзалтад оролцогчид АНУ-ын Ерөнхийлөгч Дональд Трампын Украины дайныг дуусгах чиглэлд хийсэн хүчин чармайлтыг сайшаасан байна. Харин тэд “хил хязгаарыг хүчээр өөрчилж болохгүй”-г нэгэн зэрэг онцолжээ.

Украины энхийн төлөвлөгөөний хувьд, арваннэгдүгээр сарын 23-нд Женевт болсон АНУ болон Украины төлөөлөгчдийн яриа хэлэлцээнд “нэлээд ахиц” гарсан гэж хэвлэлийн мэдээнд тэмдэглэсэн байна.

Европ болон НАТО-гийн ашиг сонирхлыг тусад нь хэлэлцэнэ

Мөн онлайн уулзалтын оролцогчид Европын орнууд болон НАТО-ийн холбоотнууд бүрэн оролцож, Европ болон НАТО-д хамаарах асуудлуудыг тусад нь хэлэлцэнэ гэсэн баталгааг сайшаажээ.

“Сонирхогчдын эвсэл”-ийн гишүүд мөн Украиныг урт хугацаанд санхүүжүүлэх шийдвэрийг яаралтай гаргах, үүнд Оросын царцаасан тусгаар улсын хөрөнгийн үнэ цэнийг бүрэн ашиглах асуудлыг зайлшгүй гэж онцолсон байна.

Мэдэгдэлд “Шударга, урт хугацааны энх тайван нь Украинд ирээдүйн аливаа түрэмгийллийг тогтоон барьж чадахуйц найдвартай, итгэлтэй аюулгүй байдлын баталгаагаар хангагдсан байх ёстой” гэж дурджээ.

Украины энхийн төлөвлөгөөний талаар хэлэлцжээ

Германы канцлер Фридрих Мерц, Францын Ерөнхийлөгч Эмманюэль Макрон, Их Британийн Ерөнхий сайд Кир Стармер нарын даргалсан онлайн хэлбэрийн “сонирхогчдын эвсэл”-ийн уулзалтад Украины Ерөнхийлөгч Владимир Зеленский, 35 орны төр, засгийн тэргүүнүүд болон бусад төлөөлөгчид, АНУ-ын төрийн нарийн бичгийн дарга Марко Рубио, Европын зөвлөлийн дарга Антониу Кошта, Европын Комиссын дарга Урсула фон дер Ляйен, НАТО-гийн ерөнхий нарийн бичгийн дарга Марк Рютте нар оролцжээ.

Онлайн уулзалтад оролцсон улс орнууд Украинд үзүүлэх санхүүгийн болон цэргийн дэмжлэгээ улам бэхжүүлэх, мөн ОХУ “шударга, урт хугацааны энхийн замд идэвхтэй орохоос татгалзсаар байгаа” нөхцөлд түүнд дарамт шахалтаа үргэлжлүүлэх шийдэмгий байдлаа бататгасан байна.

Эх сурвалж: DW
Б.ЖАРГАЛ