Авлигатай тэмцэх газраас нэр бүхий иргэдийн гаргасан гомдол, мэдээллийн дагуу Улсын нэгдүгээр төв эмнэлгийн Ерөнхий захирлын үүргийг түр орлон гүйцэтгэгч Л.Бямбасүрэнг шалгаж эхэлсэн талаар албан бус эх сурвалжууд мэдээлж эхэлжээ.

Уг шалгалт нь тус эмнэлгийн 100 жилийн ойг тэмдэглэн өнгөрүүлэхтэй холбоотой санхүүгийн зохион байгуулалт, хандивын үйл ажиллагаатай холбоотой гэх мэдээлэл байна.

Эх сурвалжийн мэдээлснээр, байгууллагын ойг тэмдэглэх үйл ажиллагааны зардлыг бүрдүүлэх зорилгоор эмнэлгийн ажилтан, албан хаагчдаас хандив цуглуулах чиглэл өгч, компанит ажил зохион байгуулсан аж.

Энэ хүрээнд залуу эмч нарт 300-500 ам.долларын төлбөртэй арга хэмжээний зардал хариуцуулах, тасаг, төвийн дарга болон эрхлэгч нарт 20-30 сая төгрөгийн санхүү бүрдүүлэх даалгавар өгсөн гэнэ.

Түүнчлэн бүх эмч, ажилтнаас оройн цэнгүүний төлбөрт 250-300 мянган төгрөгийг тус тус хураан авсан тухай асуудал хөндөгдөж байгаа аж.

Цуглуулсан мөнгөн хөрөнгийг байгууллагын бус, хувь хүний дансанд төвлөрүүлж, улмаар зориулалтын бус аргаар зарцуулсан байж болзошгүй нөхцөл байдал илэрсэн нь хууль, журам зөрчсөн эсэхийг тогтоох үндэслэл болж, Авлигатай тэмцэх газрын анхааралд өртжээ.

Одоогийн байдлаар шалгалтын ажиллагаа үргэлжилж буй юм байна.