Монгол Улс НҮБ-ын Хөгжлийн бэрхшээлтэй хүмүүсийн эрхийн тухай конвенцод 2009 оны тавдугаар сарын 13-ны өдөр албан ёсоор нэгдэн оржээ. Энэ түүхэн үйл явдал нь Монгол Улсын хөгжлийн бэрхшээлтэй хүний эрх ашгийг хамгаалах, тэднийг нийгмийн харилцаанд тэгш оролцуулах эрх зүйн орчныг шинэ шатанд гаргасан чухал алхам болсныг ГБХНХЯ мэдээлэв.

Конвенцод нэгдэн орсноор тус конвенцын үзэл баримтлалд нийцүүлэн Хөгжлийн бэрхшээлтэй хүний эрхийн тухай хуулийг 2016 онд бие даасан хууль болгон баталж, тэгш хамруулан сургах боловсролын тогтолцоог дэмжин, ажлын байрны квотыг хэрэгжүүлэх зэрэг ажлыг эрчимжүүлсэн байна. Мөн нийтийн тээвэр, зам талбай, барилга байгууламжийг хөгжлийн бэрхшээлтэй хүнд хүртээмжтэй болгох стандарт, шаардлагуудыг сайжруулж, хөгжлийн бэрхшээлийг "өвчин эмгэг" гэж харахаас илүү "хүний эрх", "нийгмийн харилцааны саад" гэж үзэх хандлага руу шилжсэн юм.