БНХАУ-ын Засгийн газраас Монгол Улсын говийн мазаалай баавгайг хамгаалах техникийн туслалцаа үзүүлэх төслийг хэрэгжүүлэхээр шийдвэрлэсэн байна. Энэ дагуу Монгол Улсын говийн мазаалайг хамгаалах чиглэлээр техникийн туслалцаа үзүүлэх төсөл хэрэгжүүлэх тухай хэлэлцээрийг 2018 оны дөрөвдүгээр сарын 18-ны өдөр байгуулсан байдаг аж.

Төслийн хүрээнд Монголын говийн мазаалайг хамгаалах төслийн техникийн туслалцааны хөтөлбөрийн эхний шатны судалгааны ажилд шаардлагатай техник тоног төхөөрөмжийг өнөөдөр хүлээлгэн өгчээ. Тодруулбал, БНХАУ-аас БОАЖЯ-нд мазаалайг хамгаалахад зориулан ашиглах 660 мянга 143 юанийн өртөг бүхий судалгаанд шаардлагатай тоног төхөөрөмжийг хүлээлгэн өгсөн байна. Уг төхөөрөмжийг Говийн их дархан цаазат газрын А хэсгийн хамгаалалтын захиргаа, Монгол талын судлаач нар ашиглаж мазаалай хамгаалахад хяналт тавьж ажиллах юм.