Угаарын хийн асуудал Монголын нийгмийг сэрээж, сэхээрүүлж байна. Сайжруулсан түлшиндээ бус шахмал түлшийг хэрэглэх аргад хараахан бүрэн суралцаагүйдээ олноороо угаартаж байна гэдэг дүгнэлтэд хүрээд байгаа энэ үед Засгийн газраас угаарын хий мэдрэх төхөөрөмжийг нийслэлийн зургаан дүүргийн гэр хороололд амьдарч буй өрхүүдэд нэг удаа үнэгүй олгох шийдвэр гаргаад байгаа. Нийт 200 гаруй мянган өрхөд зургаан тэрбум төгрөгийн өртгөөр угаарын мэдрэгч дохиолол тавина гэдгээ мэдэгдэж, гаднаас судалж байгаагаа ч хэлсэн.

Тэгвэл энэхүү төхөөрөмжийг Монголдоо үйлдвэрлэх бүрэн боломж байгаа ажээ. ШУА-ийн Физик технологийн хүрээлэнгийн эрдэмтэд MQ-7 мэдрэгчийг ашиглан агаар дахь угаарын хийг хэмжин зөвшөөрөгдсөн хэмжээнээс давсан тохиолдолд дохио өгдөг хэмжилтийн туршилтын загварыг зохион бүтээгээд байна. Энэхүү төхөөрөмж нь “LCD” дэлгэц дээр угаарын хийн хэмжээг “PPM” нэгжээр харуулах бөгөөд зөвшөөрөгдөх хэмжээнээс их үед дуут дохио өгөх юм. Тус төхөөрөмж нь микроконтроллерын удирдлагтай бөгөөд босго утга болон горимыг шаардлагад нийцүүлэн программчлан тухай бүрт нь өөрчилж сайжруулах боломжтой. Монгол эрдэмтэд өөрсдөө программчлах тул утгыг өөрчлөх, засварлах зэрэг олон давуу талтай байх юм байна.

Түлш дутуу шаталтын үед угаарын хий CO үүсгэдэг. Энэ хий нь өнгө, үнэргүй учраас хүнд мэдрэгдэхгүй тул хүмүүс “угаартаж” амь насаа алдахад хүрч байна. Тиймээс угаарын хийн хэмжээг хэмжих, аюулыг урьдчилан мэдэхийн тулд тусгай мэдрэгч багаж ашиглах шаардлагатай. Хэрвээ Төр, засгаас дэмжлэг үзүүлбэл энэхүү төхөөрөмжийг заавал гаднаас оруулж ирэх бус Монголдоо үйлдвэрлэх бүрэн боломжтой гэдгийг эрдэмтэд хэлж байна.